Kafé U’ut Sona Kafé Tuir Gostu Konsumidór

DILI, (ANTIL) –  Mikro empreza, Kafé U’ut daudaun ne’e fó ona serbisu ba timoroan na’in-10 no na’in-5 iha ona abilidade di’ak hodi sona kafé tuir gostu konsumidór nian.

Atu hemu kafé espresso no capucino di’ak ida lapresiza tenke bá rai-liur maibé restaurante Kafé U’ut nia Jerente, Gally Soares Araújo ne’ebé iha abilidade oinsá atu hanorin empregada sira kona-ba tékniku sona kafé ne’e hasai kursu kona-ba kafé nian iha Singapura durante tinan 2 nune’e Kafé U’ut ne’e rasik iha ona kondisaun atu sona rasik kafé ho mákina ne’ebé própriu.

“Buat di’ak ne’ebé ita hetan iha rai-liur, ita bele lori mai rai-laran, signifika ita lapresiza bá rai-liur atu hemu espresso no capucino di’ak ida ho presu ne’ebé aas tebes maibé ida ne’e negosiu ne’ebé asesivel kuaze ba ema hotu tanba ami-nia presu la aas maibé kualidade di’ak”, dehan Gally ba ANTIL, Sábadu (11/2) iha Mandarin, Dili.

Atu hetan kualidade kafé ne’ebé di’ak, Kafé U’ut kolabora direta ho to’os na’in sira husi Ermera, Hatulia, Maubisse nomós Laklubar.

“Ami foti direta husi sira, ami mak dezenvolve fali husi kafé musan tama to’o mai kopu. Husi prosesu naruk ida ne’e ami kontrola hotu nia kualidade, kafé ne’ebé di’ak ami rai no aat ami hasai no prosesu sona kafé mós ami kontrola nia temperatura nomós nia tempu no rai fatin hotu para garante nia sabór ne’ebé di’ak ba konsumidór sira”.

Negósiu ne’ebé Kafé U’ut halo nu’udar dezafiu ida tanba esperiénsia ba kafé ladún iha maibé tenke foti risku tanba daudun ne’e negósiu kafé domina liu husi estranjeiru sira no bainhira rai-na’in labook an iha setór ida ne’e mak aban bainrua bele sai de’it terseira parte ba produtu rai-laran nian tanba estranjeiru sei barak liu.

“Ida ne’e mak ha’u apela ba emprezáriu sira nomós start up sira ne’ebé hakarak halo negósiu, se bele banati tuir tan kona-ba kafé, kafé nia impaktu barak no naruk tanba prosesu ida ne’ebé sustentavel no ita depende loos de’it ba agrikultura no komérsiu internasionál”.

Kafé U’ut harii foufoun, hala’o husi negósiu ki’ik tebes maibé ho aderensia públiku ne’ebé resesaun ba negósiu ida ne’e, ohin loron hahú boot uitoan no konsege emprega ona timoroan balun no iha duni mákina kafé espresso boot nian iha tolu no mákina sona uza kapasidade kilo 15.

Rekursu sira ne’e mesak timoraon tanba defende filozofia ida katak dezenvolve ekonomia lokál bainhira osan ne’ebé hetan iha lokál aplika fali ba lokál hodi hakbiit fali lokál.

“Nune’e, ami-nia labarik sira balun ne’ebé serbisu iha ne’e sira halo part time job, eskola no serbisu daudaun para eduka sira bainhira eskola remata sira bele iha toman oinsá iha serbisu, labele soke maka’as bainhira eskola hotu”, Gally katak.

Enkuantu, prosesu negósiu kafé ho komunidade iha oin rua mak sosa kafé kulit tasak kilo ida sentavu 0.45 no kulit mutin hahú husi USD $1,75 to’o 2,80 maibé prosesu sosa kafé ne’e husi parte Kafé U’ut kontrola hahú husi ku’u kafé kulit tasak to’o sai kulit mutin atu labele prejudika negósiu.

Kafé U’ut ne’ebé harii iha 2015 ne’e, hahú negósiu nomós halo konstrusaun ho kapitál kuaze $15.000 to’o 20.000  ho uza tezolu mean ne’ebé SEPFOPE prepara ho produtu lokál atu habelar auto empregu ne’ebé Governu kria ona ho luan 4×5 maibé iha ona prosesu atu haluan tan fatin refere no iha fulan oin sei loke tan iha Ensul nian. (jornalista : Maria Auxiliadora; editora: Rita Almeida)