Rogerio & Lú-Olo Agradese Xanana ba Hamutuk ho Fretilin

Alin hosi saudozu Nicolau Lobato, Rogerio` Tiago Lobato agradese wa’in ba Prezidente Partidu Kongresu Nasionál Rekonstrusaun Timor (CNRT), Kay-Rala Xanana Gusmão tanba bele ba hamutuk ho Fretilin hodi lansa kandidatu Prezidente, Francisco Guterres “Lú-Olo” hodi hatudu ba ema hotu katak Timor atu ba oin tenke hamutuk.

“Ha’u nia lia fuan boot ida ba Maun Xanana tanba nia bele mai to’o iha ne’e hamutuk ho ita, hatudu ba nia maun tomak katak Timor atu ba oin ita tenke hamutuk,” Rogerio Lobato hato’o kestaun ne’e iha nia diskursu bainhira partisipa iha lansamentu edifísiu kampaña kandidatu Frencisco Guterres “Lú-Olo” iha Aimutin, Díli, Sesta (10/02/2017).

Rogerio agradese ba Xanana tanba hakarak atu hamutuk ho Fretilin hodi dezenvolve rai ida ne’e, maske iha ideias naksalak ba malu maibé hanesan fundadór ba rai ida ne’e nunka atu husik malu. Lobato husu atu ema hotu hamutuk hodi dezenvolve rai ida ne’e, esforsu tomak hodi lori Lú-Olo ba Palásiu Prezidente Aitarak laran ho primeiru ronda de’it.

Entretantu, Prezidente Partidu Fretilin nu’udár mós kadidatu Prezidente, Francisco Guterres “Lú-Olo” hateten, ho onra boot hato’o agradese wa’in ba Kay Rala Xanana Gusmão ne’ebé fó ona apoiu tomak ba nia kandidatura.

“Ha’u hakarak hato’o ha’u nia agradesementu ba ha’u nia Maun Kay-Rala Xanana Gusmão nu’udár ita hotu nia Maun-Boot. Ninia prezensa hamutuk ho ha’u ohin ita hamutuk iha fatin ida ne’e,” Lú-Olo dehan.

Lú-Olo esplika, “Ita ohin hetan mós prezensa ema ida ne’ebé iha tempu rezisténsia, iha papél ida importante iha ita nia istória tomak nia laran no ita nia konstrusaun Estadu Direitu Demokrátiku, nia maka ita nia Maun-Boot Kay-Rala Xanana Gusmão”.

Lú-Olo hatutan ita hamutu maka bele hatutan luta ne’ebé uluk Maun-Boot Kay-Rala Xanana Gusmão lidera hodi garante nafatin dame no estabilidade ba povu no rai doben Timor Lorosa’e ida ne’e.

Lú-Olo mós hato’o agradese ba Rogerio Lobato tanba bele marka prezensa iha seremónia lansamentu sede kampaña Lú-Olo nian nu’udár kamarada no mós alin hosi saudozu Nicolau dos Reis Lobato. (Efrem)

Matadalan