domingo, 12 de fevereiro de 2017

Nicolau Lobato Patrimóniu Fretilin

PARTILHAR
“Besik Kapaiña ema komesa ona kona-ba Prezidente Nicolau Lobato. Nicolau Lobato ita hotu nian, Timor hotu nian maibé primeiru patrimóniu ne’e Fretilin nian, Nia mate la’os de’it ba independensia maibé mate tanba mós Fretilin”.

Alin hosi Saudozu Nicolau Lobato, Rogerio Tiago Lobato hato’o kestaun ne’e iha nia diskursu bainhira parsisipa iha lansamentu sede kampaña kandidatu Prezidente hosi Partidu Frente Revolusionáriu Timor-Leste Independente (Fretilin), Francisco Guterres Lú-Olo iha Aimutin, Komoro, Díli, Sesta (10/02/2017).

Rogerio respeitu kandidatu sira seluk bele uza Nicolau Lobato nia naran hodi buka votus ba sira tanba demokrasia maibé Nicolau Lobato ne’e patrimóniu Fretilin nian.

Nia hatutan, luta ba dezenvolvimentu dalaruma iha dalan klaran bele iha lia naksala ba malu maibé ne’e prosesu ida. Rogerio hato’o parabens ba Xanana tanba iha Parlamentu haree katak hakilar malu barak maibé Xanan husu atu hamutuk hodi lori rai ne’e ba oin.

Iha fatin hanesan, Sekretáriu Jerál partidu Fretilin, Marí Alkatiri agradese no benvindu mós ba Rogerio Tiago Lobato ne’ebé bele hola parte iha lansamentu edifísiu kampaña Lú nian.

“Ha’u fó benvindu ikus liu maibé la’os dehan la importánsia kamarada Rogerio Lobato hanesan reprezenta família Nicolau Lobato nian,” Alkatiri hato’o agradese.

Kandidatu Prezidente, Lú mós hato’o agradese ba Rogerio Lobato ne’ebé bele hola parte iha lansamentu refere nu’udár kamarada no mós alin hosi saudozu Nicolau dos Reis Lobato.

Aleinde Xanana, estrutura importante hosi partidu CNRT mós partisipa iha lansamentu ne’e maka hanesan Francisco Kalbuadi, Veneranda Lemos, Dulce de Jesus, Bilou Mali no bainaka sira seluk hanesan Eis Prokuradora Jerál Repúblika, Dra. Ana Pessoa, Embaixadór Cuba, Veteranus, Reitór UNTL, Francisco Martins, kuadrus polítikus, militantes no simpatizantes partidu Fretilin nian tomak.  (Efrem)

Matadalan
PARTILHAR

Author: verified_user

Publicação luso-timorense sem fins lucrativos

0 comentários: