quinta-feira, 2 de março de 2017

Ambulánsia no Polísia mak Bele Kontra Demokrasia

PARTILHAR
DILI, (ANTIL) – Demokrasia ne’e katak, ema ida-idak ho ninia papel, ho objetivu mak repúblika ninia interese maibé, ambulánsia no polísia bele kontra demokrasia, Prezidenti Konsellu Imprensa, Virgilio Guterres hatete iha semináriu ida iha ótel Timor, Segunda, (27/2).

”Ida ne’e hanorin ita hodi hatene ida-idak ninia papel,” Prezidenti KI hasara eis Prezidenti Portugal, Jorge Sampaio ninia lia-fuan bainhira taka semináriu ne’ebé realiza hosi KI ho tema kompeténsia no dezafiu órgaun reguladora komunikasaun sosiál.

Demokrasia, nia hatutan ho ezemplu, motorista, siklista, kondutór no ema la’o ain tenki hatene ida-idak ninia dalan hodi kumpri sinais tránzitu.


Maibé, buat rua ne’ebé bele kontra sinais tránzitu ou demokrasia tuir lei haruka mak ambulánsia no polísia kuandu hasoru problema emerjénsia ruma.

”Hanesan ema profisionál labele husik ita nia-án atu halo informasaun falsu nomos labele uza ema seluk nia trajedia atu sai ita nian susesu,” Virgilio Guterres hatutan mos mensajen hosi oradór portugues Carlos Magno Constanheira nu’udar prezidenti entidade regulár ba komunikasaun sosiál Portugal.

Oradór sira hosi semináriu ne’e mak Carlos Magno Constanheira nu’udar prezidenti entidade reguladór ba komunikasaun sosiál, prezidenti komisaun A parlamentu nasionál, deputada Carmelita Moniz, António Brigido Correia nu’udar prezidenti autoridade nasionál komunikasaun no prezidenti KI, Virgilio Guterres.

Nune’e mos, deputada Carmelita Moniz iha ninia intervensaun husu ba jornalista sira atu ka’er prinsípiu objetividade hodi garante públiku ninia direitu ba kualidade informasaun.

“Mídia na’in tenki hato’o kualidade informasaun ho objetividade la’os jornalista nia hanoin”, katak eis juiza tribunál distritál Dili ne’e. (Jornalista: Rita Almeida / Editor: Gantry Meilana)

Foto hosi liman karuk, Sekretáriu Estadu Komunikasaun Sosiál, Nélio Isaac Sarmento bainhira loke semináriu, Prezidenti KI, Virgilio Guterres, oradór Carlos Magno Constanheira, prezidenti entidade reguladór ba komunikasaun sosiál Portugal, António Brigido Correia nu’udar prezidenti autoridade nasionál komunikasaun. Foto ANTIL/ António Dasiparu
PARTILHAR

Author: verified_user

Publicação luso-timorense sem fins lucrativos

0 comentários: