quinta-feira, 2 de março de 2017

TIMOR-LESTE PRECISA PRESIDENTE HOSI JERASAUN FOUN!

PARTILHAR
Clik foto
António Maher Lopes / Fatuk Mutin, ne’ebé hetan apoiu hosi Partido Socialista de Timor (PST), nia mak sei hetan eleitu ba Prezidente Timor-Leste nian iha 2017.

Sinál konkretu ba mudansa ne’ebé atu mosu mak kandidatu hosi jerasaun foun ida mak sei hetan eleitu iha 2017 ida ne’e mós hetan liuhosi dadus kona-ba eleitór sira.

Tuir dadus eleitorál ikus nian, iha Timor-Leste sei iha kala eleitór 728.363 hanesan ne’e, rihun 153 mak iha Díli. Totál eleitór sira, no iha faktu seluk ida, liu hosi metade (51%) iha idade entre tinan 17 to’o 35, tanba ne’e, foin-sa’e sira lubuk ida maka buka no hakarak iha mudansa, sira la haree ba figura kandidatu sira uluk nian, ne’ebé ema bolu líder istóriku sira, no sira rasik mós rekoñese katak tenke fó-fatin ba jerasaun foun sira.

Presiza rekoñese katak progresu iha ita-nia Estadu sei kuran, ne’e tanba haree hosi polítika ne’ebé adota hodi harii ESTADU ne’e rasik, haree momoos hela katak, loroloron populasaun sira ne’ebé kbiit-laek liu halerik beibeik, tanba la asesu ba meius-subsisténsia, no mós la asesu ba servisu saúde no sira-nia oan sira la asesu ba eskola, tanba la iha kbiit atu kompete iha setór produsaun ekonómiku hotu-hotu.

Sira barakliu ne’ebé uluk iha tempu susar liu nia laran luta maka’as ba Ukun-rasik an ohin-loron sira sente katak Estadu tau sira ba kotuk, buat ne’ebé uluk sira nunka sente, iha prosesu harii Estadu nian no ida-ne’e halo sira susar liu atu hetan hahán.

Iha konsiénsia liután katak, FRENTE KLANDESTINA hala’o nia knaar, liu-liu hafoin dékada 80, ho importante no determinante tebetebes, la’os atu fó-tulun ba frente sira seluk de’it, hodi mobiliza populasaun tomak ba luta polítika urbana no mobiliza rekursu materiál hodi bele asegura sobrevivénsia iha Luta Armada, no mós kombatente (funu-na’in) sira-ne’e duni mak hamosu no organiza Gerrilla Polítika no Urbana iha Indonézia tomak, fatór hanesan ne’e mak kontribui hodi hamonu lalais rejime Suharto nian atu fó fatin ba Prezidente Indonézia foun hodi define lalais solusaun konflitu Timor-Leste nian.

Rekoñese katak dalan ba prosesu harii Estadu no Dezenvolvimentu Nasionál nian ne’e iha duni maibé hamosu diskriminasaun oioin ba sira-ne’ebé mukit liu, kbiit-laek liu, no hirak seluk ne’ebé iha podér polítiku ki’ikoan liu, kulturál, no mós ekonómiku, buat sira ne’e mosu tanba regra konkorénsia livre no neo-liberalizmu mak domina, ne’e hotu hatudu katak, kandidatu António Maher Lopes/Fatuk Mutin, mai hosi Frente Klandestina, naran-boot iha Timor-Leste tanba nia haksumik knaar importante iha luta klandestina nian, liuliu iha ligasaun metin ho kultura tradisionál, ne’ebé ho Partido Socialista de Timor (PST) no kombatente sira hosi Brigada Negra sira-nia apoiu tomak, halo nia iha kondisaun ida-ne’ebé natoon no prienxe rekizitu atu manán eleisaun prezidénsial iha Marsu 2017.

Tanba ne’e, hodi-hanoin hikasfali loron istóriku proklamasaun independénsia 28 Novembru 1975 nian, Francisco Xavier Amaral, ne’ebé hetan apoiu hosi FRETILIN, mak sai Prezidente dahuluk Repúblika Timor-Leste nian. António Maher Lopes / Fatuk Mutin, ne’ebé hetan apoiu hosi Partido Socialista de Timor (PST), nia mak sei hetan eleitu ba Prezidente Timor-Leste nian iha 2017.

Díli, 01 / Março 2017

PARTILHAR

Author: verified_user

Publicação luso-timorense sem fins lucrativos

0 comentários: