sábado, 25 de março de 2017

Ema 1 Mate, 9 Kanek Grave

PARTILHAR
DILI - Seidauk hatene sa motivu, ema ida ho inisial A derepente lori katana saruntu no taa komunidade  iha Suku Orlala, Postu Administrativu Laklubar, Munisipiu Manatuto.

Asaun brutal nee rezulta ema ida mate iha fatin, nain sia sira seluk hetan kanek grave, oras nee halo hela tratamentu intensivu iha Hospital Nasional Guido Valadares (HNGV).

Tuir Komandante PNTL Munisipiu Manatutu, Superientendente Polisia, Inacio Saldanha, vitima nain 9 evakua ona ba iha Hosipita Nasional Guido Valadares (HNGV) hodi halo tratamentu intensive,  tanba hetan kanek grave.

Seidauk hatene kauza husi insidente nee, tanba prosesu investigasaun sei lao hela,” dehan Inacio ba Jornalista sira iha CFP Comoro Sesta, (24/03/2017).

Komandu Polisia Nasional Timor Leste (PNTL), Munisipiu Manatuto, tuir Inacio hola medidas kapturasaun ba suspeitu, maske suspeitu tenta atu halai.

Nia informa insidenten nee akontese iha loron 23/03/2017, tuku 2:00 kalan, wainhira vitima sira toba hela iha uma laran, suspeitu lori katana tama ba vitima sira nia uma hodi taa vitima sira.

Suspeitu ami kaptura kedas, tanba suspeitu mos hetan ataka husi familia vitima, suspeitu mos kondisaun grave no oras nee iha hela Hospital Guido Valadares, suspeitu tenta atu halai, maibe lakonsege tanba polisia too kedas iha fatin akontesementu no kaptura,” informa Inacio.

Tuir Komandante nee kazu nee nia  prosesu  komandu PNTL Manatuto hatoo ona ba Ministeriu Publiku Distrital Baucau hodi hetan legalidade ba  prosesu.

Kronologia husi akontesementu nee inisiu husi mate ida familia sira hakoi tiha ona, bainhira fila husi simiteriu, familia sira kontinua hader meja, maibe too iha kalan boot, tuku 2:00 OTL, suspeitu ho inisial A, foti katana koa naan nian tama ba uma laran hodi taa vitima sira neebe toba hela.

Tuir informasaun, entre vitima ho suspeitu sei iha relasaun familia, maibe la hatene sa motivu supeitu halo asaun ida nee. Kazu nee agora dadaun sei  prosesu investigasaun polisia nian.

Iha biban nee diariu STL liu husi via telefone tenta konfirma kazu nee ba iha Xefe Suku Orlala, maibe la konsege tanba lina telefone fora de area.Too nutisia nee publika seidauk hetan klarifikasaun husi falimia no mos parte Hospital Nasional Guido Valadares (HNGV). Lucia Ximenes

Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: