TOUR DE TIMOR 2017 AIRNORTH FÓ APOIU $260.000

Airnorth  fó apoiu ba aktividade Tour de Timor tinan 2017 ho total orsamentu $ 260.000

Fundador Tour de Timor José Ramos Horta informa asuntu ne’e ba jornalista sira, katak apoiu sira ne’e hanesan dalan ida atu labele fó todan deit ba Governu.

“Airnorth konfirma ona total sira nia apoiu ne’e ho ekipamentus, bilete viajen. Ha’u mós hetan ona konfirmasaun husi grupo bo’ot ida iha Singapura, grupu iha Sidney. Ha’u husu ba sira para bele sponsor Timoroan sira, tanba sira ema ne’ebé iha osan, sira saude di’ak, sira nia vida tomak han di’ak, bisikleta di’ak, treinu di’ak. Ita nian iha difikuldade tanba ne’e maka ha’u husu ba sira para fó ekipamentus ne’ebé kompletu bisikleta, luvas, meias, kapasete i tenki iha mós programa hahan nian, fulan primeiru halo medikal cek. Sé ema ruma iha moras tenki halo tratamentu no ami trata ida ne’e,” dehan Ramos Horta iha Timor Lodge Comoro, Kuarta (15/03/2017).

Ramos Horta informa katak, Tour de Timor iha fulan Setembru tinan ida ne’e sei hatudu rezultadu ne’ebé bo’ot no iha Outubru Maratona Internasional mós sei hatudu rezultadu di’ak.

“Ha’u kontaktu ona sponsor bo’ot sira hanesan iha Amerika, Dubai no sira prontu ona atu apoiu. Ne’eduni ha’u iha konfiansa, alénde programa rua ne’e, ita sei halo moó peskas desportiva, ekipa bo’ot ida foin dadauk sira ba Com estuda iha ne’ebá i sei halo konkursu ida internasionál fotografia luku nian,” dehan nia.

Iha fatin hanesan Ofisial Xefi Ezekutivu Airnorth Daniel Bowden hatete nu’udar sponsor prinsipal ba Tour de Timor desde inísiu, Airnorth ho kontenti dala ida tan bele servisu hamutuk iha eventu 2017 ne’e.

“Airnorth oferese ona apoiu signifikante iha parte lojistika hodi suporta sikilista, mekániku ba bisikleta no ekipa ba tinan barak nia laran iha Tour de Timor”, nia dehan.

Daniel Bowden dehan tan, kuaze sikilista nain 350 maka sei patisipa iha korida bisikleta foho ne’ebé sei sai koñesidu liu no hetan lukru iha Ázia, kurida ne’e sei hala’o iha loron 19-23 fulan Setembru tinan ida ne’e.

Nune’e mós Prezidenti Federasaun Sikilista Ângelo Hendrique agradese ba apoiu husi Airnorth no kongratula mós ba fundador Tour de Timor José Ramos Horta ne’ebé ho inisiativa bo’ot hodi hala’o aktividade ida ne’e.

“Ema ne’ebé halo atividade bo’ot hanesan ne’e, la’os fasil ne’ebé federasaun siklista fó apoiu total ba José Ramos Horta hodi organiza no ami servisu hamutuk nafatin,” dehan nia iha Timor Lodge.nes

Jornal Nacional Diário