Governu Estabelese Autoridade Inspesaun Alimentar

Governu estabelese ona autoridade especial ida  hodi halo inspesaun no fiskalizasaun ho rutina ba atividades ekonomia, liu –liu kontrola produtus no hahan iha supermerkadu no restorante sira ne’ebe eziste iha rai laran.

Koordenador Autoridade Inspesaun no Fiskalizasaun ba Atividade Ekonomia, Sanitaria no Alimentar (IFAESA), Abilio Oliveira hateten  lolos servisu inspesaun la’o desde tinan 2009, maibe la efetivu tanba servisu la integradu.

 “Uluk ministerio hat halo servisu ida, maibe agora instituisaun ida deit mak hala’o servisu ne’e atu labele kria konfusaun ba konsumidores no negosiante sira,” nia hateten iha servisu fatin Matadouru, Dili.

Nia dehan, autoridade foun ne’e kompostu husi reprezentante Ministerio Saude (MS), Miniserio Agrikultura e Peskas (MAP), Ministerio Komersio, Industria e Ambiente (MCIA) no Ministerio Turismu e Arte Kultura.

Alende ne’e, sira mos sei halo koordenasaun ho laboratorium sira iha rai laran inklui rai liur hodi halo teste ba aihan sira ne’ebe iha duvidas, depois rezultado fo sai ba publiku.

Nia hateten, la’os deit supermerkadu no restorante maibe sira mos sei tama-sai merkadu lokal no pertamina sira iha rai laran.

Tuir dekretu lei No 23/2009 kona ba regime inflasoens administrativu kontra ekonomia, hateten negosiante ga supermerkadu ne’ebe fa’an sasan estragadu hanesan tomate no lis dodok sira, sei hetan multa $1.000 to’o $10 mil, enkuantu ba produtu liu prazu sei multa $10 mil to’o $15 mil.

 “Ami halo inspesaun, identifika fo multa no sasan ne’ebe estragadu inklui liu prazu ami foti halo destroi, maibe ba protudu sira sei duvida lori ba laboratorium atu halo teste konfirmasaun,” nia hateten.

Kona ba preokupasaun komunidade nian ba produtu balun hanesan ayam potong, ikan, na’an sira iha jelera laran fa’an iha supermerkadu sira, nia dehan presiza halo duni teste hodi haree klean kona ba kualidade produtus ne’e, maibe agora laboratorium teste aihan seidauk iha.

Tanba ne’e, nia husu ema hotu tenke preokupa no fo atensaun ba kestaun ida ne’e tanba 90% sasan inklui alimentar importa husi rai liur.

Iha parte seluk, Diretor Nasional Saude Publiku Ministerio Saude, Pedro Canisio hateten papel autoridade ida ne’e importante tebes atu promove negosio ne’ebe justu no defende direitu konsumidores iha rai laran.

“Ita hein, katak sira sei halo servisu inspesaun no kontrolu diak liu tan,” nia esperansa.

The Dili Weekly