terça-feira, 18 de abril de 2017

MAROMAK NIA ILHAS MOTIVA SARANI LUTA KONTRA PEKADU

Sarani Katolika iha mundu tomak, inklui iha Timor Leste Domingo (16/4) selebra festa Paskoa Jesus nia moris hias husi mate.

Serimonia Paskoa ninian ne’e hahú husi semana santa, iha Kinta feira santa fase apostlo sira nia ain, Sesta feira santa, Nai Jesus Kristu terus no mate iha kruz, Sabadu Aleluia ka vigilia Paskal no Domingo misa resurisaun, Nai Jesus Kristu nia moris hias husi mate.

Amu Parokia Igreja Santo António Motael Dili, Pe. David da Conceição hateten, konsensia Nai Maromak nia moris no ilhas sei sai motiva ba ema hotu atu hakas-an hodi luta kontra pekadu.

“Iha misa santa paskoa ne’e katak, Kristu moris hias ona hodi dehan,ema ne’ebé terus ba lia los, justisa, luta atu justisa la’o ba oin, no bem comum la’o ba oin. Ema ne’e Maromak hamutuk ho nia, maibé ema sé de’it mak kontra lia los hodi interese partikular hodi hakarak sobu diak no los Maromak rasik mak sei sai nia inimigu. Tamba ne’e keta haluha Maromak nia poder, pozisaun, no Maromak nia lei, maibé tenki tau iha fuan katak, Maromak nafatin Maromak, labele separa mundu nia riku-soin ho Maromak, tanba ne’e mai husi Maromak ninia,”Amu paroquia Igreja Santo António Motael Pe.David da Conceição, hatun lia murak ne’e wainhira prezide misa Sabadu Aleluia (15/04/2017) iha parokia Motael.

Pe.David da Conceição, fó ezemplu nasaun Japaun, Portugues, Indonesia ukun Timor hodi joga no sobu, maibé Timor-oan la halo sala nune’e Maromak defende to’o hetan ninia independensia.

“Hadomi nia rai doben Timor ikus mai Timor ukun-an tiha ona ba tinan 15 ona, tanba Maromak hamutuk ho Timor nafatin hodi proteje, tanba ne’e haka’as-an ba, ba buat di’ak no los,” Amu parokia Motael ne’e haklaken.

Iha misa Sabado Aleluia ne’e Amu Parokia Motael husu ba sarani katólika sira atu aprende lisaun pasadu hodi muda vida moris lor-loron nian sai foun.

“Ema laran aat, laran moras, sei moris iha nakukun laran, maibé ema ne’ebé moris ho sakrifisiu, honestu ba ema hotu, nia sei hetan naroman husi Maromak no hetan dalan di’ak ba nia moris lor-loron”, Pe. David da Conceição esplika.

Misa vigilia Paskal iha Igreja Motael ne’e hala’o iha oras tuku 20:00 Otl ne’e sarani hahu husi labarik, ferik ho katuas no jovens mak  partisipa iha selebrasaun misa refere. Selebralasaun misa ne’e mos hetan seguransa husi Polisia Nasional Timor Leste (PNTL) Munisipiu Dili.

Pascoa lori sarani refleta moris pasadu

Iha parte seluk Amu paroquia Becora, Pe. Guilhermino da Silva hatutan, sabado aleluia lori ema tomak atu ba fali tempu pasadu hodi refleta hahalok ne’ebe mak liu ona no tuir dalan foun fila fali.

“Reflesaun ne’e importante atu halo fresku fila fali motivasaun no hakarak ne’ebé komesa namlaek dadauk ona,”haklaken Amu Parokia Becora.

Pe. Guilhermino da Silva espilika liu tan katak, Jesus nia mate ne’ebé trajiku tebes husik hela krize bo’ot ba ninia eskolante, halo eskolante sira nia esperansa rungu-ranga no futuru mos nakukun dadauk, hanesan nakukun iha Jesus nia mate.

“Ema sira buka Jesus nia rate atu fo honra ba Jesus nu’udar sira nia mestre, maibe rate ne’e lao’s fatin ne’ebe serteza, basa rate mamuk tiha ona, nia la iha ona i nia moris hias husi rate. Galileia hanesan apostolu sira nia moris fatin, no iha Galileia Jesus bolu apostolu sira atu tuir nia, fila fali ba Galileia, i Jesus bolu sira atu refleta fali sira ninia vokasaun no hare fila fali sira nia moris hamutuk ho Jesus iha roman cruz no resurisaun nian,”tenik Pe. Guilhermino da Silva. tos/ito

Jornal Nacional Diário

Sem comentários: