terça-feira, 18 de abril de 2017

Mike Pence aviza Pyongyang hodi la testa determinasaun hosi Donald Trump nian

PARTILHAR
Visi-prezidente Estadus Unidus nian, Mike Pence, rekomenda ona iha loron-segunda ne'e ba Pyongyang hodi labele halo teste ba "determinasaun" hosi Donald Trump nian kona-ba programa balístiku sira no nuklear sira norte-koreanu nian.

"Di'ak liu ba Koreia-Norte atu labele halo teste ba determinasaun no poder hosi Forsa Armada Estadus Unidus nian iha rejiaun ne'e", Pence hatete durante konferénsia ida iha Seul ne'ebé iha mós prezensa hosi xefe Estadu súl koreanu nian, Hwang Kyo-Ahn.

"Iha semana rua ikus ne'e, mundu haree ona poder no determinasaun hosi ami nia prezidente foun [Donald Trump] ho operasaun sira ne'ebé lansa iha Síria ho iha Afeganistaun", Mike Pence hatete no refere ba atake sira hosi Estadus Unidus hasoru rejimi Damasku nian no ba lansamentu hosi bomba GPU-43 iha teritóriu afegaun nian.

Donald Trump ne'ebé iha loron-kinta afirma ona katak "problema" norte-koreanu sei "trata" hanesan tuir ne'ebé maka fó sai ona hodi haruka porta-aviaun sira norte-amerikanu Carl Vinson ba península koreanu, akompaña ho aviaun tolu lansa-misil no submarinu sira.

Iha loron-sábadu, rejimi Koreia-Norte afirma ona katak nasaun prepara hela hodi "hatán ba funu total ho funu total" no katak "atake nuklear ida sei iha vingansa ho atake nuklear ida mós".

Hahú hosi loron-domingu maka Mike Pence vizita Koreia-Súl no iha loron-segunda ne'e ba iha zona fronteira, zona ida ne'ebé maka iha militar barak iha mundu.

"Ami sei estraga atake sira hotu no ami sei hatán ho dalan aat tebes no efikas ba utilizasaun ruma hosi arma konvensional sira ka nuklear sira", hatutan hosi visi-prezidente norte-amerikanu nian.

Pence dezafia "komunidade internasional" hodi presiona Koreia-Norte.

Iha fatin seluk, Mike Pence, maski konsidera pozisaun pozitivu sira hosi Pekin kona-ba Koreia-Norte, nia hatutan ona katak Estadus Unidus senti "la hakmatek" kona-ba dalan ekonómiku sira ne'ebé hili hosi Repúblika Popular Xina hasoru instalasaun hosi sistema antimisil (THAAD) norte-amerikanu nian iha Koreia-Súl.

SAPO TL ho Lusa | Foto@ Yonhap South Korea Out /EPA
PARTILHAR

Author: verified_user

Publicação luso-timorense sem fins lucrativos

0 comentários: