terça-feira, 18 de abril de 2017

Justisa súl-koreanu akuza ofisialmente eis-Prezidente Park

PARTILHAR
Prokuradoria súl-koreanu akuza ofisialmente iha loron-segunda ne'e eis-Prezidente Park Geun-hye no haruka ona kazu ba tribunal penal tanba suspeita sira korupsaun ne'ebé bele hamosu iha kondenasaun ida entre tinan 10 kadeia no to'o prizaun perpétua.

Eis-xefe Estadu ne'e hetan akuzasaun ba subornu, abuzu poder, koasaun no divulgasaun hosi segredu ofisial sira, informa hosi ajénsia Yonhap ne'ebé haktuir hosi Efe.

Park, ne'ebé lakon ona nia imunidade prezidensial hafoin destituída iha loron 10 Marsu, hela iha prizaun preventivu kuaze loron 20 resin tanba nia prezumível knaar iha rede ne'ebé harii hamutuk ho nia amiga Choi Soon-sil (koñese hanesan "Rasputina" tanba nia proximidade ho eis-Prezidente), ne'ebé deskonfia naok dolar millaun 70 resin ba empreza boot sira.

Park nia julgamentu karik sei hahú iha semana hirak tuirmai no bele demora to'o fulan neen, nune'e maka eis-prezidente sei hela iha prizaun preventivu.

Prokuradoria fó sai mós katak akuza ona prezidente hosi Grupu Lotte, Shin Dong-bin, tanba deskonfia fó ba rede osan wone millaun 7.000 (dolar millaun 6,15), no hatutan ona katak sei la akuza prezidente hosi Grupu SK, Chey Tae-won, ne'ebé karik lakohi kolabora ho eskema.

Kazu "Rasputina" nian halo foer ona "Chaebol" sira (grupu emprezáriu boot sira súl-koreanu nian), entre sira maka emprezáriu boot nasaun nian, Samsung, ne'ebé nia prezidente, Lee Jae-yong, kaer ona iha fulan-Fevereiru no hein julgamentu.

Akuzasaun formal hosi eis-Prezidente Park, ne'ebé insisti iha nia inosénsia iha interogatóriu sira, koinside ho inísiu, ne'ebé iha loron-segunda ne'e mós, hosi kampaña eleitoral ba prezidensial antesipadu sira, ne'ebé sei halo iha loron 09 fulan-Maiu.

Prokuradoria desidi aselera akuzasaun hodi tenta atu notísia ne'e ladún hamosu influénsia iha kampaña.

Park Geun-hye sai ona hanesan xefe Estadu dahuluk ne'ebé maka Koreia-Súl hatún iha demokrasia no ne'e sei hanesan eleisaun prezidensial antesipadu dahuluk sira dezde junta hosi jeneral Chun Doo-hwan autoriza ona realizasaun hosi eleisaun demokrátiku sira iha fulan-Dezembru 1987.

SAPO TL ho Lusa | Foto@ Chung Sung-Jun/EPA
PARTILHAR

Author: verified_user

Publicação luso-timorense sem fins lucrativos

0 comentários: