Provizóriu, Governu Taka Regal Casino iha Hudilaran

DILI, (TATOLI) – Governu liuhosi servisu entre ministeriál halo inspesaun ba atividade jogu slot “Regal Casino” iha Hudilaran Dili, no deside taka provizoriamente atu oinsá kompañia bele kumpri rekezitu lisensa tuir lei haruka.

“Atividade ne’e pauza (taka provizóriu-red) hodi prense rekezitu lisensa nian, nia nain rasik koopera di’ak no konkorda sei kompleta dokumentu”, Diretór Ezekutivu SERVE, Florêncio Sanches ba jornalista sira hafoin inspesaun, sesta, (7/4).

SERVE prontu ajuda atu prense rekezitu no bainhira buat hotu loos bele relata dokumentu ba Ministériu Turizmu Arte no Kultura (MTAK) tanba, SERVE eziji ba kompañia hanesan entidade legal no entidade ba negósiu.

Florêncio esplika, taka atividade ekonomia bainhira seidauk iha sertifikadu. “Governu la’ós hamate ema nia negósiu, só atu regula tanba reseita Estadu mai husi atividade ekonomia”, katak.

Diretór ne’e haktuir, inspesaun ne’e bazeia ba intrusaun Ministru Estadu Koordenadór ba Asuntu Ekonómika (MEKAE) semana ne’e, tanba haree liafuan “Casino” taka iha fatin públiku, enkuantu ita hotu hatene katak Casino la eziste iha Timor-Leste.

“Ministru fó instrusaun ba ha’u atu forma ekipa, primeiru verifika kompañia nain, hafoin verifika meius elektronik tuir baze dadus no arkivu fíziku. Hatudu, kompañia ne’e la tuir regulamentu, deklara ba Estadu atu hatama ekipamentu”, katak.

Diretór SERVE apela, atividade hanesan ne’ebé eziste iha teritóriu tomak tenke banati regulamentu.

Iha fatin hanesan nain ba kompañia Regal Casino, Nunu Muhamad Guterres dehan sei taka provizoriu atu rezolve lisensa no la’o tuir fali dalan legál atu bele kontribui ba Estadu liuhosi selu reseita.

“Ha’u promete sei la to’o semana rua, ha’u esforsu para bele loke fali”, katak. “Sé SERVE la fó sai lisensa, ita ba selu impostu mós sistema la-simu. Ha’u prontu atu koopera ho lei, agradese diretór SERVE ho ekipa konjuntu tun mai”.

Kompañia ne’ebé foin loke atividade jogu iha tinan 2017 ne’e iha staff timoroan kuaze 300.

Inspesaun konjuntu ne’e halo hosi Ministériu Turizmu Arte no Kultura (MTAK), Ministériu Komersiu, Industria no Ambiente (MKIA), Ministériu Finansas (MF), SERVE, Sekretariu Estadu Polítika Formasaun Profesionál  no Empregu (SEPFOPE) no Polísia Nasionál Timor-Leste (PNTL). (Jornalista: Julia Chatarina - Editora: Rita Almeida)

Foto: Regal Casino ne'ebé governu taka provizoriu hodi kompleta dokumentu ou rekezitu tuir lei haruka. Foto Tatoli/Julia Chatarina