segunda-feira, 10 de abril de 2017

Presiza Lei Regula Facebook iha Timor-Leste

DILI (TATOLI) — Prezidenti Komite 12 Novembru Gregorio Saldanha husu atu parte kompetenti iha Timor-leste kria lei hodi regula redi sosiais Facebook tanba ikus-ikus ne’e ema uza Facebook la ho etika.

“Facebook iha Timor-Leste halo ema la iha ona etika ba ema seluk, presiza lei ruma atu regula ida ne’e,” Geregorio Saldanha informa ba Agensia TATOLI iha nia kna’ar fatin, Caicoli, Sesta (07/04/2017).

Teknologia ne’ebé mak avansadu iha mundu ohin loron nia konsikuensia mak halo ema ona étika ba ema seluk.

Realidade iha Timor-Leste liuhosi Facebook, ema komesa la respeita ita nia lider nasionál sira. Kazu konkreta mak Facebook ida ho naran PAPAUA CAMPAIGN iha loron rua liu ba halo públikasaun ida iha nia wall Facebook, nia halo editasaun ba foto lider Nasionál Timor-Leste, hanesan aktual Prezidenti da Repúblika Taur Matan Ruak ho aktual Ministru Planiamentu Investimento estratejiko Kay Rala Xanana Gusmão nia foto inklui Mari Alkatiri nia foto ho modelu defama.

“Situasaun sira hanesa ne’e presija lei ruma atu regula lalaok Meius Komunikasaun Sosiál sira hanesan Facebook ne’e,” Gregorio sujere.

Husu ba Governu liu-liu parte kompetenti tenki haree asunto sira hanesan ne’e ho seriu, kria lei hodi regula atu nune’e ita prevene kedan agora duke situasaun ne’e ikus maibé estraga tomak ema nia morál.

Funsaun Facebook

Ema kuaze mairoia iha mundu rai klaran mak ohin loron iha akun ba Facebook tanba sira konsidera Facebook nu’udar meus komunikasaun ida ne’ebé integra an iha redi sosiais atu utiliza halo interasaun ba malu bainhira dok ba malu liuhosi online.

Alem de ida ne’e, Facebook nia  funsaun mós atu ajuda ita fahe esperensia rua ne’ebé mak iha ba nia maluk sira iha Facebook, ajuda estabelese komunidade ruma bainhira iha intreses hanesan atu nune’e fasilita komunika ba malu. Bele utiliza nu’udar fatin halo negósiu, bele mós uza hanesan meus atu buka kolega.

Biar nune’e, Facebook rasik nia utilizasaun mós iha pontu negativu, ezemplu liuhosi Facebook ema bele haree content ou situs pornografia sira, Facebook bele hamosu problema entre grupo ho grupo, facebook ita bele bosok malu.

Akun Facebook Iha Timor-Leste

Hosi publikasaun extrapolation of facebook data, Janieiru 2017 (Facebook usage analysis, usa) ne’ebe posting hosi Timor Social loron 5 Fevereiru 2017, utilizasaun facebook hosi Timoroan sira hamutuk ona ema rihun 400 ho posentazem 95 uza liu hosi mobile ho nia utilizasaun kada loron kuaze 40 %. Husi numeru ne’e, facebook rejista 38% nia nain feto no 63% mane.

Hare’e ba utilizasaun Facebook nian ne’e, hosi numeru total populasaun Timor-Leste ho miliaun 1,2 (34 % urbano), iha porsentu 33 Timoroan ne’ebe utiliza internet, inklui redi sosial Facebook.

Facebook harii hosi Mark Zuckerberg, estudante psikolojia Universidade Harvard. Facebook hahu ho naran Facemash.com iha 23 Outobru 2003. Portal ne’e ba deit estudante universidade Harvard deit hodi halo komparasaun ba fotografia rua entre feto rua ne’ebe mak “manas” liu no lae.

Iha 11 Janeiru2004, Zuckerberg rejista domain thefacebook.com ne’ebe kontinuasaun hosi Facemash hodi bele kria relasaun entre estudante Harvard nian.

Iha Agostu 2005, thefacebook.com trok anaran facebook.com ho folin US$ 200.000. Ih atinan hanesan, Facebook.com hetan investidor ho hahu servisu hamutuk ho Apple no Microsoft. Iha fim 2005, Facebook to’o ona iha EUA, Canada, Mexico, UK, Australia, New Zealand no Irlandia, ne’ebe dadauk ne’e globalmente iha ona nasaun hot-hotu. (Jornalista: Manuel Pinto / Editor: Gantry Meilana)

Sem comentários: