UNICEF: Krizi finanseiru 2007 nian halo aumenta pobreza infantil iha tersu rua

Krizi finanseiru no ekonómiku ne'ebé hamosu falénsia hosi Lehman Brothers iha tinan 2007 halo aumentu ida iha pobreza infantil iha Europa iha 2/3, haktuir hosi relatóriu ida Unicef nian ne'ebé fó sai iha loron-kinta ne'e.

Aumentu ne'e iha dékada ikus nia laran sai hanesan aas hosi 15% iha Xipre, iha Islándia no iha Grésia no entre 7% no 9% iha Hungria, Itália ho España.

Estudu "Children of Austerity: impact of the great recession on child poverty in rich countries", hosi responsabilidade Sentru Investigasaun - Innocenti hosi UNICEF, kolabora hamutuk ho instituisaun 16 investigasaun internasional sira, hatudu efeitu sira hosi krizi no resposta polítika sira hosi governu sira iha labarik sira iha nasaun sira ne'ebé iha rendimentu aas.

Estudu aprezenta perspetivu ida komparativu iha nasaun 41 hosi OCDE no hosi UE no análize detalladu ida kona-ba nasaun 11.

"Iha nasaun riku sira, labarik barak sai afetadu maka'as tanba krizi ekonómiku global, ho pobreza infantil - kompara iha nível pré-krizi sira - ne'ebé aumenta iha nasaun barak", afirma hosi Yekaterina Chzheniha, hosi Sentru Innocenti no hanesan mós koeditora hosi publikasaun no autora prinsipal hosi kapítulu komparativu, iha komunikadu ida ne'ebé haruka ba redasaun sira.

"Ne'e hanesan estudu internasional dahuluk kona-ba efeitu sira krizi nian no resposta sira hosi governu sira ne'ebé tau foku iha labarik sira iha nasaun riku sira", nia afirma.

Tuir estudu, gastu sira ho família sira no labarik sira iha Europa "diminui bainhira presiza tebes. Laiha nasaun europeu ida aumenta gastu sira iha benefísiu sira ba família sira no 2/3 hamenus despeza tuir kapita, bainhira gastu sira iha pensaun sira aumenta ona iha amostra sira entre tinan 2010 no 2013".

Iha área Saúde nian, taxa sira hosi "nesesidade saúde la satisfeitu" aumenta maka'as iha agregadu familiar sira ne'ebé kiak liu iha nasaun tomak hosi amostra nian, no liuliu, iha Grésia no iha Espãna.

Iha fatin seluk, krizi ho austeridade sira aumenta maka'as ona entre rejiaun sira.

"Pobreza infantil "fiksa iha tempu" aumenta ona 20% iha norte Itália nian no 50% iha súl nasaun nian entre tinan 2008 no 2014; iha Reinu Unidu, taxa pobreza infantil nian iha Irlanda-Norte auemnta hosi 23 ba 27%, bainhira iha Eskósia, Inglatera no Wales, tuun ho pontu 2-4", refere hosi komunikadu.

Pobreza infantil iha Estadus Unidus la sa'e maka'as hanesan tuir hanoin. Maski iha aumentu ba dezempregu ba kuaze dobru, verifika de'it aumentu ki'ik ida hosi pobreza infantil iha EUA.

"Jenerozidade boot ida no kobertura hosi rede seguransa sosial durante krizi halakon impaktu ne'e iha família sira ne'ebé iha labari", konklui hosi estudu.

"Proteje rendimentu família iha tempu diminuisaun hanesan importante hodi kombate pobreza infantil, maibé la to'o. Labarik sira afeta maka'as bainhira iha diminuisaun iha gastu sira ho eskola sira no ekipamentu sira saúde nian, no bainhira aman-inan sira la konsege asede ba serbisu importante sira, hanesan kuidadu infantil sira", afirma hosi Yekaterina Chzhen.

"Mensajen hosi publikasaun ne'e maka hodi proteje labarik sira iha tempu di'ak sira no iha tempu aat sira, governu sira tenki fó prioridade ba konjugasaun hosi apoiu universal iha termu rendimentu sira, bazeia iha seguransa sosial no ne'ebé testadu, ho despeza sira saúde nian no edukasaun ne'ebé diresionadu ba sira ne'ebé presiza", hatutan hosi koautora serbisu nian.

SAPO TL ho Lusa