Debate ParPol jornalista mak modera

DILI (TATOLI) –Prezidente Interinu CNE, Duarte Tilman informa katak, Comissão Nacional das Eleições (CNE) diside ona atu jornalista senior mane ida ho feto ida mak sei modera debate Partidu Politiku (ParPol), iha semana ida ne’e nia laran.

“Moderadór ba debate partidu polítiku sei mai hosi jornalista ne’ebé esperiénsia ona, entre feto ida no mane ida (latemi nia naran) atu bele iha iguldade jéneru,” Duarte Tilman informa ba Agensia TATOLI iha salaun CNE, Segunda (12/06).

Debate partidu polítiku sira sei akontese entre loron, Sabdo, 17  no Domingo, 18 Jullu iha salaun Lalini Larigutu, edifisiu Comissão Nacional das Eleições (CNE).

Debate bele akontese entre loron ne’ebé determinadu, maibe sei hein sorteiu hosi tribunál rekursu.

Debate vizaun, misaun no programa politiku ne’e mos sei fo sai kanál Radio Televizaun Timor-Leste (RTTL) atu sidadaun sira akompanha.

Enkuantu, modelu debate, partidu polítiku sira sei aprezenta programa, vizaun, misaun no sei iha debate entre debatór hosi partidu polítiku hotu.

Modelu debate ne’e, atu fasilita votante sira hodi deside iha loron ne’ebé markadu eleisaun nian, nune’e kampaña partidu polítiku sei realiza iha 20 Juñu no eleisaun lejislativa sei akontese 22 Jullu. 

Jornalista: Zezito Silva | Editor: Manuel Pinto

Foto: Duarte Tilman | TATOLI