TDD Rejeita Vitima VD Hakarak Dame ho Arguidu

DILI - Tribunál Distritál Dili (TDD), liuhosi audensia julgamentu ba kríme violénsia domestika, tersa (06/06), la autoriza vitíma ho arguidu ne’ebé hakarak dame malu, no dada kazu hosi Tribunál.

Juiza prosesu singular, Julmira Auxliadora, ne’ebé prejide audensia, konsidera VD hanesan kríme públiku, tanba ne’e bainhira parte vitíma ho arguidu atu hili dalan dame, lei la autoriza hodi fó dalan atu dame malu, tenke prosesu tuir dalan justisa ne’ebé maka iha ona.

Iha kazu ne’e vitíma Adelia Maria da Costa ne’ebé maka hanesan feen hosi arguidu MJS, hakarak dada kazu no lakohi prosesa arguidu ba Tribunál maske kazu ne’e tama ona iha prosesu julgamentu.

Tribunál esplika, kazu VD hanesan kríme públiku entaun Tribunál iha obrigasaun atu prosesa tuir lei artigu 145 ninian hosi kodigu penál.

Lei mós la fó dalan ba kríme ne’e atu vitíma dada filafali kazu. Kríme VD la hanesan kríme semi públiku ne’ebé fó dalan vitíma atu dada kazu.

“Iha ita-nia artigu ne’ebé iha ba kríme públiku, ezemplu hanesan kríme violénsia domestika ne’e lei la fó dalan atu vitíma dada filafali kazu, naun ser kríme semi públiku,” esplika Tribunál ba vitíma Adelia iha sala audensia laran.

Iha biban ne’e, Tribunál mós kontinua hala’o julgamentu ba kríme VD ne’ebé maka komete hosi arguidu MJS.

Tribunál lei sai faktu ne’ebé ministériu públiku akuza ba arguidu katak, arguidu ho vitíma moris hanesan feen ho la’en iha oan na’in 2. Iha loron 23 fulan-Janeiru 2013 oras tuku 11:00 kalan, iha subdistritu Vera Cruz, suku Villa Verde, aldeia Moris Foun, vitíma arguidu nia kaben telefone ba arguidu nia alin mane ida atu mai tula vitíma nia oan moras iha uma atu nune’e lori ba fó vitíma nia banin sira haree.

Entretantu hafoin Tribunál le sei akuzasaun Ministériu Públiku, Tribunál labele rona deklarasaun arguidu tanba arguidu agora daudaun laiha Timór no servisu ona iha Inglatera.

Tanba ne’e Tribunál rona de’it deklarasaun hosi vitíma, katak faktu sira ne’e loos hotu motivu hosi kazu ne’e akontese tanba de’it arguidu vitíma nia la’en deskonfia ka ciumento demais liubá vitíma ho arguidu nia alin mane.

“Kazu ne’e ha’u haluha faktu barak ona, maibé ha’u sei hanoin de’it mak ha’u-nia laen baku ha’u, tanba de’it nia rona ha’u telefone ba nia alin pois nia ciumento fali ha’u,” deklara vitíma ba Tribunál.

Depois rona deklarasaun Tribunál submete kedan ba alegeasaun ikus, tanba ne’e ministériu públiku husu ba Tribunál atu aplika pena administrasaun tanba razaun antes ne’e arguidu ho vitíma simu fali malu hanesan feen ho la’en, no fó sala ba malu ona tuir kultura.

Nune’e mós parte defeza husu ba Tribunál atu absolve arguidu tanba razaun arguidu durante ne’e kolabora ho Tribunál.

Depois rona alegasaun, Tribunál adia audensia kazu ba loron 9 fulan-Juñu oras tukun 9:00h deder atu lé akordaun ikus. Audensia ne’e prezide hosi juis singular, Julmira Auxliadora, parte MP reprezenta prokuradór Nelson Belo, defeza arguidu hetan asistensia legál hosi defesór públiku, Sebastião Magno. (jxy)

Timor Post