segunda-feira, 12 de junho de 2017

Lia-portugés la’ós fasil

DILI (TATOLI) - Sekretáriu Estadu Komunikasaun Sosiál (SEKOMS), Nélio Isaac Sarmento hatete projetu konsultóriu língua ba jornalista sira atu ajuda jornalista sira iha koñesimentu kona-ba lia-portugés,atu nune’e ajuda populasaun oinsá mak halo publikasaun infomasaun hodi provoka atu hatene lalais portugés.

“Klaru katak buat ne’e la’ós fasil. Ita tenke la’o neineik maibé ita espera katak loron ida buat ne’ebé ita hakarak sei sai realidade,” Nélio Isaac hatete iha Palásiu Governu hafoin entrega sertifikadu ba jornalista sira, ohin.

Lia-portugés, inportante ba timoroan, tanba iha informasaun no dokumentu barak iha país ida ne’e sempre ho lia-portugés.

Nune’e papél jornalista nian mak tenke fó informasaun ne’ebé di’ak kona-ba intensaun husi lei ida atu nune’e populasaun bele hatene, maibe ida ne’e mos jornalista sira tenki hatene lia-portugés.

“Jornalista sira tenke hatene uluk portugés para bele entende intensaun husi lei, ne’ebe haerek ho lia-portugés, So nune’e jornalista sira fó informasaun ba ita-nia komunidade karik informasaun ne’ebé loloos hodi ema bele komprende liután,” eis xefi redasaun Televisaun Timor-Leste ne’e fo hanoin.

Hodi hatutan ba formandu sira ne’ebé akaba ona kursu nivel B1 no simu ona sertifikadu ne’e, sei kontinua nafatin ho nivel ne’ebé sa’e no to’o loron ida bele prátika portugés ne’ebé di’ak tebes ba Timor-Leste liuliu ba instituisaun mídia sira ne’ebé mak sira serbisu ba.

Jornalista hamutuk 24 husi orgaun komunikasaun sosiál hanesan Timor Post na’in-ualu, Rádiu Televizaun Timor-Leste na’in-hitu, Konsellu Imprensa ida, Matadalan rua, Grupu Média Nasionál tolu, no SEKOMS tolu, simu sertifkadu iha kursu nivel B1 hafoin tuir formasaun intensiva durante fulan rua ho oras 200. Formasaun ne’e kria liuhusi kooperasaun entre SEKOMS ho Governu Portugál através Instituto Camões.

Jornalista: Maria Auxiliadora | Editór: Manuel Pinto

Foto: Jornalista 24 husi órgaun komunikasaun sosiál simu sertifikadu hafoin turi kursu nivel B1. Sertifikadu ne'e entrega husi reprezentante embaixadór de Portugál, Luís Cunha, SEKOMS, Nélio Isaac Sarmento no formadór sira mak Cláudia Taveira no Manuel Oliveira. Foto/António Gonçalves.

Sem comentários: