Difisiente Triste ho Fatin Sentru Votasaun

DILI - Difisiente sira sente triste teb-tebes ho sentru votasaun iha suku Fatuhada, tanba fatin nee fisil teb-tebes ba difisiente sira neebe mak uza kadeira roda.

Preokupasaun nee hatoo husi Antonio Jose Aniceto, hanesan difisiente, sente  lamenta no triste teb-tebes ho fatin sentru votasaun suku Fatuhada iha eskola baziku filial no  1,2 Fatuhada, tanba fatin nee, nakonu ho fatuk, entaun ba sira neebe mak ho kondisaun difisiente sira nee, difisil teb-tebes, tanba uza kadeira roda, tanba nee, husu ba governu foun mai, karik aban bain rua presiza haree fatin neebe mak diak, atu nunee  labele fo impaktu ba sira ho kondisaun difisiente sira.

"Ba hau nia haree, votasaun ba tinan ida nee, hau hanoin iha mudansa no diak, maibe hau preokupa uituan nee, konaba fatin ba ami nudar difisiente sira nee, fatin ladun diak ba ami, tanba fatin nee mak hanesan buat ida karik menhanbat  ami nian maluk difisiente sira atu mai fo sira nian direitu atu vota nee, dala ruma sira mai too iha fatin nee, haree ba iha fatin nee ladun diak, sira  bele fila deit, maibe ami sira neebe mak  iha vontade hakarak vota, ami bele vota, nee duni, hau hanoin ba governu foun mai, sebele karik, haree didiak fatin neebe mak uza atu vota,” dehan Antonio ba STL hafoin vota iha sentru votasaun suku Fatuhada iha EBF no 1,2  Fatuhada  Dili Sabadu  (22/07/2017).

Nia hatete, difisente iha Timor laran nee barak tebes, tanba sira hakarak atu fo sira nian vota, tuir sira ida-idak nian konsiensia rasik no hakarak, maibe fatin nee tenke diak ba sira, tanba fatin ida nee, maluk sira neebe mak uza kadeira roda nee, difisil tebes.

Nunee mos Maria de Jesus, nudar difisiente matan, sente kontenti no orgullu boot, maske nia  ho kondisaun difisiente, maibe sira lakohi lakon sira nian direitu, hodi bele fo sira  nian votus, ba partidus politiku sira neebe mak sira hakarak.

Tuir  observasaun  STL  iha terenu katak, sentru votasaun  suku Fatuhada  iha  eskola baziku filial  Fatuhada loke tuku 7 dader, no  hetan antoziasmu husi komunidade sira hakat ba iha sentru votasaun, hodi bele ezerse  sira nian direitu, no  sentru votasaun nee, hetan seguransa  maximu husi membru polisia nasional Timor Leste (PNTL), tanba nee, situasaun seguransa iha suku refere lao hakmatek, total  sentru votasaun iha suku  Fatuhada rua, stasaun  8. Jacinta Sequeira

Suara Timor Lorosae