domingo, 9 de julho de 2017

Hospital iha Xina suspende ai-moruk hodi trata Prémiu Nobel Liu Xiaobo nia kankru

PARTILHAR
Hospital xinés ne'ebé maka Prémiu Nobel Dame Liu Xiaobo internadu hela informa ona katak suspende ona uzu ai-moruk sira hodi kombate kankru ne'ebé halo ativista ne'e moras hodi evita alivia aten ne'ebé fraku.

Iha deklarasaun ida ne'ebé fó sai iha ‘site’, First Hospital of China Medical University hatete ona katak ekipa médika desidi suspende uzu hosi ai-moruk ida tanba Liu Xiaobo nia aten ne'ebé la funsiona ona ho di'ak. Refere mós katak hapara mós uzu hosi medisina tradisional hodi trata tumor.

Deklarasaun hanesan indika katak ekipa médika adisiona ai-moruk ida ba tratamentu hodi trata tromboze venoza ne'ebé maka ativista ne'e hetan hela iha nia ain ida.

Liu Xiaobo, ho tinan 61, hetan kondenasaun iha tinan 2009 ba kadeia durante tinan 11 tanba revolta, hetan liberdade kondisional hafoin diagnostikadu, iha fulan-Maiu, ho kankru ida iha aten iha faze terminal.


Iha semana liubá, Liu Xiaobo nia feen fó hatene ona katak labele opera kankru iha aten ne'ebé Nobel Dame xinés ne'e sofre, iha vídeo ida ne'ebé fó sai iha Internet.

Ho tanis, Liu Xia sujere ona katak hanesan laiha utilidade tratamentu médiku sira hanesan kimioterapia ka radioterapia, durante vídeo, ho de'it segundu 10, ne'ebé fó sai liuhosi Twitter.

Iha loron-kuarta ne'e Xina konvida ona médiku estranjeiru sira hodi halo ezame ba estadu saúde Nobel Dame xinés nian.

Nasaun oioin husu ona ba Pekin hodi autoriza Liu Xiaobo hodi halo viajen ba estranjeiru hodi halo tratamentu médiku, pedidu ida ne'ebé hatudu mós hosi ONG oioin no hosi defeza ba direitu ema sira nian.

Símbolu hosi luta ba demokrasia nian iha Xina, Liu Xiaobo, ho tinan 61, hetan kondenasaun hafoin sai hanesan promotor ida hosi "Karta 08", manifestu ida ne'ebé apoia introdusaun hosi reforma polítika demokrátiku sira no respeita ba ema sira nia direitu iha nasaun ne'e, antes asina ona hosi ema intelektual sira hamutuk na'in 300 resin, inspiradu iha “Karta 77” ne'ebé lansa hosi Vaclav Havel iha antigu Xekoslovákia sosialista.

Antigu profesor Literatura nian iha Universidade Pekin hakerek ona kona-ba sosiedade no kultura xineza nian, sentra iha demokrasia no iha ema sira nia direitu no uluk hanesan koñesidu iha grupu intelektual.

Liu sai mós hanesan animador ida hosi movimentu estudantil pró-demokrasia hosi Prasa Tiananmen, iha tinan 1989, tama iha kadeia durante fulan 21 hafoin represaun violentu hosi protestu sira.

Iha tinan 1996, hetan kondenasaun ba tinan tolu hosi "reedukasaun liuhosi serbisu", tanba asaun sira luta ba direitu fundamental sira.

Iha loron 08 Dezembru 2008 hetan kaer fali, loron rua antes publikasaun, tanba okaziaun hosi aniversáriu ba dala 60 hosi Deklarasaun Universal hosi Direitu Ema nian, hosi "Karta 08", maski loron formal detensaun nian maka ih aloron 23 Juñu 2009, tanba deskonfia "halo asaun sira ajitasaun nian ne'ebé hakarak revolusiona Governu no hamonu sistema sosialista".

Iha loron 09 Dezembru 2009 hetan akuzasaun ofisial tanba "provoka revolusaun hosi poder Estadu nian" no iha loron 25 fulan hanesan, hafoin julgamentu ida ne'ebé la kumpri padraun prosesual internasional mínimu sira, hetan ona kondenasaun ba kadeia tinan 11.

Akademia Nobel fó ona ba nia iha loron 08 Outubru 2010 galardaun Dame nian, hodi rekoñese "luta naruk no la violenta ba direitu ema sira nian ne'ebé fundamental iha Xina".

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: