ONU: Aumenta hamlaha no falta uda halo Áfrika Oriental iha estadu alerta

Nasaun sira hosi Áfrika Oriental agora daudaun iha estadu alerta tanba laiha udan, situasuan ne'ebé repete ba tinan tolu konsekutivu no ne'ebé bele hamosu inseguransa alimentar iha rejiaun ne'e, hatete hosi ONU ohin.

Organizasaun ONU nian ba Alimentasaun ho Agrikultura (FAO) hatete ona katak númeru hosi ema sira ne'ebé presiza asisténsia humanitáriu iha Somália, Etiópia, Kénia, Tanzánia ho Uganda to'o ona millaun 16, liu 30% duké iha tinan 2016 nia rohan.

Iha nota informativu ida alerta nian, ajénsia ONU nian aviza ona katak temporada konsekutivu datoluk ba falta uda nian halo família sira hosi rejiaun ne'e laiha rekursu sira hodi hasoru senáriu ne'e no tanba ne'e presiza apoiu ida "urjente ho efikás".

Área oioin hosi nasaun lima ne'ebé referensiadu hosi FAO rejista ona menus hosi metade hosi nível normal sira aselerasaun sazonal nian ba família sira lakon daudaun kultura no hahán.

ONU alerta ona mós katak, hanesan ho ema moris sira, animal millaun resin terus mós.

Iha Somália, kuaze metade hosi populasaun total terus falta hahán maka'as no ajuda humanitáriu maka ikus ne'e evita aumentu hosi hamlaha maka'as iha nasaun ne'e, haktuir hosi FAO, ne'ebé kalkula katak kondisaun sira iha rejiaun sei sai aat liu iha fulan hirak tuirmai ne'e bainhira estasaun rai-maran hahú.

Iha teritóriu somali, no mós iha Kénia, alimentasaun hosi bibi-atan sira - funsaun importante ida iha ekonomia rural - agora daudaun hetan ameasa tanba taxa mortalidade hosi bibi no karau sira no ladún iha produsaun susubeen nian.

Folin hosi animal sira ne'ebé konsege moris hasoru kondisaun sira hanesan ne'e tuun nafatin, tanba kondisaun fíziku ne'ebé aat hosi animal sira ne'e. Sereal sira fa'an ho folin inflasaun ne'ebé aas ne'ebé hamosu susar hodi hetan hahán sira hanesan ne'e.

FAO asinala mós akontesimentu ba praga sira, liuliu hosi lagarta ne'ebé namkri iha Áfrika Oriental ne'ebé hamosu estraga iha kultura agríkola sira hosi rejiaun iha kontinente afrikanu nian.

Ajénsia ONU kalkula katak iha 2017 hamlaha sei aumenta iha mundu tomak, liuliu tanba impaktu hosi rai-maran ho konflitu sira, hodi alerta katak ema millaun 30 resin sei hahú hamlaha iha nasaun sira hanesan Sudaun-Súl, Somália, Nijéria ho Iémen.

SAPO TL Lusa