Organizasaun Joventude Hala’o Asaun Doasaun Ran

Organizasaun joventude sira servisu hamutuk ho Banku Nasional de Sangue (BNS) hala’o atividade doasaun ran hanesan jestu solidaridade ba malu.

Prezidente Alumni Parlamentu Foinsa’e Timor –Leste (APFTL), Zaulino da Silva hateten atividade doasaun ran ne’e hala’o hodi selebra loron mundial joventude ne’ebe monu iha dia 19 fulan Agostu.

Nia dehan, asaun ida ne’e reprezenta sentimentu domin ne’ebe joven sira iha ba maluk Timor oan sira ne’ebe presiza tulun.

“Oferese voluntariamente ran ba ita nia maluk Timor oan sira ne’ebe moras baixa hela iha ospital nasional ne’ebe presiza ita nia tulun, liu –liu inan sira,” nia hateten iha edifisio Sekretario Estado Joventude e Desportu, Lecidere, Dili.

Nia espera, ho kontribuisaun ida ne’e bele ajuda ona ospital nasional liu –liu banku nasional de sangue hodi responde ba iha nesesidade sira, tanba ran tenke mai husi ema ida, la fa’an iha loja.

Nia informa, atividade ida ne’e halo anualmente hodi selebra loron mundial joventude iha Timor -Leste, tinan ida ne’e hala’o ho tema “hau nia ran bele salva ema seluk nia vida”.

Nia hateten, partisipantes la’os deit mai husi organizasuan foinsa’e sira, maibe mai mos husi universitario sira, instituisaun Polisia Nasiional Timor –Leste, Faintil Forsa Defeza Timor –Leste (F-FDTL) inklui funsionario sira SEJD nian.

Entretantu, Mediku Geral Polisia Militar Alferes Rui da Silva Fernandes hateten sira iha koordenasaun servisu ne’ebe diak tebes ho organizasaun joventude sira atu atu hala’o asaun solidaridade hanesan ne’e hodi tulun ema seluk.

Nia dehan, iha membrus nain 15 komponente tolu hanesan Unidade Polisia Militar, komponente formasaun interna no komponente naval.

“Hau espera, asaun ida ne’e bele fo tulun ba ema moras sira no habelar tan informasaun atu bele kontinua atividade ne’e hodi ajuda ospital responde ba iha nesesidade ne’ebe iha,” nia esperansa.

Nia mos, enkoraja joven sira atu servisu maka’as no halo asaun positive sira hodi kontribui ba dezenvolvimentu nasaun nian.

Iha parte seluk, Xefe Unidade Banku Nasional de Sangue Gilberto Madeira hato’o agradese ba foinsa’e sira ne’ebe ho voluntariamente organiza atividade solidaridade ida ne’e hodi tulun ema seluk.

“Stok ran ba fulan ida ne’e sufsiente, maibe ami nafatin esforsu halo promosaun atu bele rekolha ran barak liu tan hodi asegura stok,” nia hateten.

Nia dehan, dala barak instituisaun no organizasaun sira mak fo konvite ba sira atu halo doasaun ran, maibe dala ruma BNS mak fo konvite ba iha instituisaun estado sira, publiku atu partisipa iha atividade doasaun ran iha loron mundial doasaun ran ne’ebe monu iha 14 fulan Julhu.

Paulina Quintão | The Dili Weekly