Hasai ema rihun 144 resin iha Illa Bali tanba posível erupsaun hosi vulkaun

Hasai ema rihun 144 resin iha Illa Bali, destinu turístiku prinsipal hosi Indonézia, tanba posível erupsaun hosi vulkaun Agung, fó sai hosi Governu indonéziu iha loron-sesta ne'e.

Ema sira ne'e hasai no fahe entre sentru sira ne'ebé iha hamutuk atus resin iha distritu sia illa nian no simu apoiu hosi komunidade lokal sira no hosi Governu ba sira nia nesesidade báziku sira.

Diretór hosi informasaun hosi Ajénsia Nasional ba Jestaun Dezastre nian, Sutopo Purwo Nugroho, hatete ona ba ajénsia española notísia nian Efe katak, maski zona seguransa besik vulkaun hanesan mamuk, rezidente balun lakohi sai hosi fatin.

Razaun ida ne'ebé maka rezidente sira hatete katak lakohi husik sira nia uma maka lakohi husik sira nia animal.

Nugroho, ne'ebé la hatete númeru hosi ema sira ne'ebé hela nafatin iha sira nia uma, fó hanoin ezemplu hosi erupsaun vulkaun Merapi nian, iha 2010, ne'ebé halo ema na'in 277 mate tanba motivu hanesan.

Zona seguransa estabelese abranje liña ida to'o kilómetru 12 besik kratera no nível alerta to'o ona nível haat, nível máximu, iha loron 22 Setembru.

Autoridade sira tau ona sirene móvel sira hodi alerta populasaun.

Sentru Vulkanolojia no Mitigasaun hosi Perigu Jeolójiku sira indonéziu nian refere ona iha loron-sesta ne'e iha komunikadu ida katak movimentu sísmiku sira ne'ebé rejista iha loron hirak ikus ne'e "halo ona risku ida iha falla ida hosi vulkaun nian".

Aleinde ne'e, iha loron balun maka koluna ida ho suar mosu hosi kratera no atinji aas ida entre metru 50 no 200.

"Bainhira akontese erupsaun, iha liu posibilidade atu hanesan ki'ik antes, maibé bele akontese mós erupsaun boot ida", hatete hosi Sentru Vulkanolojia no Mitigasaun hosi Perigu Jeolójiku nian.

Espesialista sira alerta ona katak labele iha konviksaun katak sei iha erupsaun ida hosi vulkaun ne'ebé situa iha metru 3.014 hosi tasi leten maski sira hatete katak bele akontese.

Sentru Vulkanolojia no mós governu provinsial Bali nian hatete katak iha seguransa hodi halo viajen ba illa no estabelese planu ida hodi rediresiona movimentu aéreu ba aeroportu sira seluk bainhira erupsaun taka aeroportu internasional Denpasar nian, iha kapital illa nian.

Indonézia iha vulkaun liu 400 ne'ebé iha vulkaun pelumenus 127 maka ativu. Arkipélagu indonéziu halo parte iha "Ring of Fire" hosi Pasífiku, área boot ida hosi atividade sísmiku no vulkániku nian ne'ebé maka tinan-tinan iha rai-nakdoko sira ne'ebé ho magnitude ki'ik.

SAPO TL ho Lusa | Foto@ Made Nagi /EPA