Ministeriu Edukasaun Implementa To’os Eskola Iha Eskola Hat

Ministeriu Edukasaun (ME) implementa ona grograma to’os eskolar iha eskola hat iha munisipiu rua (Ermera no Dili), mak eskola baziku filial Akanunu no Hera, enkuantu eskola Dona Ana Lemos no Fatuquero iha Ermera.

Diretor Nasional Asaun Sosial Eskolar, Belchior Maria Almeida Barros Guerra hateten implementasuan programa to’os eskola iha eskola tolu ne’e diak, so iha Akanunu mak iha problema tanba menus bee moos. 

“Agora, ami tama iha munisipiu sia no programa la’o ona e munisipiu sia ne’e sei sai sentru ba treinamentu ba eskola husi munisipiu seluk,” nia afirma.

Nia informa, munisipiu Dili nian mak Hera no Akanunu e iha Atauro mos iha eskola rua, iha Bobonaro iha Lolotoe, Viqueque iha Ossu e kuaze munisipiu sia ne’e la’o hotu ona.

“To’os eskolar ne’e la’os ita atu halo produsaun, maibe atu fo konesementu ba alunu sira hodi uza espasu ne’ebe eskola iha, aproveita ita kuda netik modo ruma, nune’e estudante sira hatene servisu agrikultura nian,” nia informa.

Alende sira simu siensia teoria iha sala laran, nia deha estudante sira mos bele pratika kuda, rega no akompanha prosesu halo to’os ne’e oinsa, to’os sira koileta sira bele halo ba merenda eskolar.

Entretantu Koordenador EBF Vila-Verde Adelaide de.J.B Martins hateten ida ne’e programa ida ke diak tanba bele kuda modo ruma ne’ebe mak presiza.

“Modo ruma ne’ebe bele fasilita ba merenda eskolar, hanesan mostarda, repoilho , bayam, ai farina tahan karik bele hodi halo modo ba merenda eskolar, maibe ami nian merenda eskolar ne’e uza deit repoilo ho mostarda deit,”nia dehan.

Alende ne’e, nia dehan bele mos kuda aihoris hirak ne’ebe bele halo ba temperus nian, hanesan ailia, kinur no seluk tan ne’ebe bele kuda iha to’os eskola ne’e.

Nia hatutan, ida ne’e parte ida husi materia estudu do meio, professor sira bele aproveita hanorin oinsa atu pratika.

Iha parte seluk Sekretario Jeral rede edukasuan Timor-Leste Coalition for Education (TLCE), Jose Monteiro hateten ne’e programa ida diak tebes, tanba kontribui ba dezenvolvimento ekonomia mos alende sira aprende kona ba lala’o halo to’os nian.

“Hau sente to’os eskolar ne’e importante tanba fo vantajen ba prosesu dezenvolvimento personalidade labarik ninian,” nia hateten.

To’os eskolar, nia dehan hanesan mos fatin atu aprende no pratika, hanesan laboratorium, sira kuda buat ruma, sira haree oinsa nia prosesu hodi dezenvolve mos sira nia kapasidade.

Celestina Soares, Est | The Dili Weekly