Opozisaun timoroan hein atu Governu aprezenta versaun foun ba programa iha loron 30 nia laran

Opozisaun timoroan nian hatete, iha loron-tersa ne'e, katak hein atu Governu aprezenta nia programa foun "iha loron 30 nia laran" rejeita katak dokumentu sei aprezenta ho orsamentu retifikativu, hanesan ezekutivu fó sai katak hanoin atu halo.

"Tempu hanesan limitadu tebes ba loron 30 no Governu tenki fila hodi aprezenta programa ba parlamentu", hatete hosi Arão Amaral, líder hosi bankada Congresso Nacional da Reconstrução Timorense (CNRT).

Pozisaun ne'ebé defende mós hosi líder bankada Partidu Libertasaun Popular (PLP) nian, Fidelis Magalhães, ne'ebé insisti katak iha momentu tomak "tenki respeita konstituisaun".

"Kona-ba loron 30 ami iha ami nia interpretasaun, ami entende di'ak tebes saida maka konstituisaun hatete no ami senti seguru katak konstituisaun hanesan klaru no hatudu dalan tuir ho ami nia interpretasaun", Magalhães hatete iha deklarasaun ida ne'ebé maka haktuir mós hosi Luis Roberto da Silva, xefe bankada Kmanek Haburas Unidade Nacional Timor Oan (KHUNTO).

Forsa tolu, ne'ebé kontrola deputadu na'in 35 hosi deputadu na'in 65 iha parlamentu, harii ona Aliansa Maioria Parlamentar (AMP) ida ne'ebé hakarak sai hanesan alternativu hosi Governu.

Konstituisaun ho rejimentu hosi Parlamentu Nasional konfirma ona katak presiza proposta rejeisaun rua hodi xumba programa, ho nune'e Governu sei monu maibé laiha testu ida maka defini saida maka akontese entre proposta rua ne'e ka defini aspetu sira hanesan prazu sira no ba aprezentasaun programa daruak hosi ezekutivu.

Fonte jurídika sira ne'ebé ko'alia ba Lusa iha opiniaun ne'ebé la hanesan kona-ba saida maka bele hanesan deskontu ka interpreta lejislasaun, ho fonte balun sujere katak iha kazu sira hanesan ne'e prosesu bele tuir faze sira hosi aprezentasaun dahuluk nian, debate no votasaun, ka sei hetan tan loron 30.

Maski nune'e, Governu fó sai iha komunikadu katak halo hela revizaun ba programa ne'ebé hanoin aprezenta, hamutuk ho Orsamentu Retifikativu ba 2017, "to'o tinan ne'e nia rohan" ka, ho prazu ida ne'ebé iha máximu liu loron 30.

Iha konferénsia imprensa hamutuk iha loron-tersa ne'e bankada opozisaun sira kestiona mós liafuan ne'ebé primeiru-ministru hatete iha parlamentu, hafoin xumbu ne'ebé opozisaun, katak hanoin "halo referendu" ba programa ezekutivu nian iha populasaun, hodi hatete katak xefe Governu nian laiha kompeténsia hodi konvoka referendu ida.

Arão Amaral hatete katak Governu "bele halo konsulta" kona-ba programa maibé labele hanoin atu organiza referendu ida tanba ne'e hanesan kontra konstituisaun.

Fidelis Magalhães repete kona-ba nesesidade hosi "líder sira hosi partidu Governu nian hodi kontinua esforsu sira konsertasaun polítika nain hodi hetan solusaun konstitusional ida ba dezafiu sira ne'ebé nasaun hasoru".

Líder sira hosi bankada tolu rekuza ona halo "espekulasaun" kona-ba saida maka sira sei halo bainhira Governu demora liu loron 30 hodi aprezenta programa no fó hanoin katak desizaun kona-ba saida maka sei halo bainhira Governu monu - eleisaun antesipadu ka formasaun ba Governu foun ida ne'ebé sai hosi atual parlamentu - "hanesan desizaun hosi Prezidente Repúblika nian".

Hafoin konferénsia imprensa, AMP fahe komunikadu imprensa hamutuk ida ne'ebé repete pozisaun hosi bankada tolu iha kuadru hosi debate apresiasaun ba programa Governu nian, ne'ebé akontese ona entre loron 16 no 19 Outubru.

Testu fó hanoin katak bankada parlamentar sira iha "dever ho kompeténsia" hodi apresia programa, konsidera katak testu falla tanba la kumpri ezijénsia sira iha termu substánsia no kestiona forma ba primeiru-ministru hatán ba opozisaun.

"Señór primeiru-ministru la'ós hatán ba pergunta sira ne'ebé hato'o maibé uza nia tempu ba diskursu polítiku sira, dalaruma ataka deputadu sira hosi bankada sira opozisaun nian hodi halo kampaña no aproveita transmisaun direitu hosi kanal sira hosi media nasional sira nian", refere hosi testu.

Komunikadu hatete fali fundamentu sira hosi pozisaun AMP nian katak Governu laiha apoiu maioritáriu iha parlamentu, katak ne'e bele kria insustentabilidade ba períudu governasaun nian no katak futuru Timor-Leste nian labele influensia ba situasaun hosi "impozisaun polítika hosi Governu minoria ida hasoru maioria".

Governu minoritáriu ida, ka ne'ebé "fraku, frájil no la estável hamosu dúvida barak no la garanti konfiansa hosi merkadu sira, hosi investidor estranjeiru sira, públiku ho privadu sira, no iha dezenvolvimentu ekonomia nian iha nível tomak".

AMP husu ba nia militante sira no apoiante sira atu halo asaun ho dalan "síviku no responsável", felisita dalan "pasífiku ho kalma" hosi populasaun hodi akompaña debate ba programa nian.

SAPO TL ho Lusa