Papua Nova Guiné husu ba Austrália hodi iha responsabilidade ba migrante sira iha illa Manus

Ministru ba Imigrasaun hosi Papua Nova Guiné husu, iha loron-segunda ne'e, ba Austrália atu iha responsabilidade ba migrante na'in 700 resin ne'ebé maka agora daudaun iha sentru detensaun iha illa Manus, ne'ebé taka iha loron-tersa ne'e.

Ho baze iha akordu bilateral ne'ebé hala'o, Papua Nova Guiné laiha obrigasaun hodi kuida ema atus resin ne'ebé maka detidu iha sentru ida ne'ebé patrosinadu hosi governu Canberra nian, ne'ebé lakohi haruka ba parte sira seluk iha nasaun, hatutan hosi Petrus Thomas iha komunikadu.

"Sira sei hanesan responsabilidade hosi Austrália nian, nune'e sira maka tenki hetan opsaun iha nasaun sira seluk no tama iha kontaktu ho governu sira ne'e hosi nasaun ne'ebé halo parte hanesan la'ós-refujiadu hodi hahú repatriasaun voluntáriu ka la voluntáriu", hatutan hosi ministru.

Austrália ativa fali, iha 2012, polítika ba tramitasaun ba nasaun sira seluk hosi pedidu sira migrante sira nian ne'ebé halo viajen ba nia teritóriu hodi buka azilu no konkorda hodi loke sentru sira detensaun nian iha Papua Nova Guiné no iha Nauru.

Iha fulan-Abril tinan ne'e, Supremu Tribunal hosi Papua Nova Guiné deklara ona sentru ne'ebé lokaliza iha illa Manus hanesan la tuir konstituisaun no haruka autoridade sira hodi taka.

Sentru ne'e tenki taka iha loron-tersa ne'e, bainhira pelumenus ema na'in 770 kontinua iha nafatin fatin ne'e, haktuir hosi informasaun hosi organizasaun la'ós governu sira nian.

"Austrália nia vontade hodi apoia Papua tenki hatudu loloos ho kazu sira seluk iha fulan hirak tuirmai ne'e (…). Tenki haree fali akordu hodi klarifika obrigasaun internasional sira", hatete hosi Thomas hodi adianta katak ministru sira hosi nasaun rua ne'e sei aperfeisoa detalle sira ba paktu foun ida.

Organizasaun la'ós governu nian ne'ebé defende direitu ema sira nian, hanesan Human Rights Watch ka Amnistia Internasional, alerta nafatin ba perigu atu ema sira ne'e lakon protesaun iha Papua Nova Guiné tanba taka instalasaun sira hosi tramitasaun ba pedidu sira azilu nian.

Iha deklarasaun sira ba Rádiu New Zealand, Thomas relativiza ona preokupasaun kona-ba área seguransa, saúde ho alimentasaun relasionadu ho ema sira ne'ebé maka iha nasaun, hodi garanti katak sei iha "tranzisaun fásil" ida no katak autoridade australianu sira iha intensaun hodi fó auxíliu.

ONU ho grupu sira ne'ebé defende direitu ema nian kritika nafatin sentru detensaun sira ne'e, kualifika katak kondisaun sira ne'ebé migrante sira hasoru la hanesan adekuadu ba ema sira.

Ema sira ne'ebé maka kaer iha Nauru ho Papua Nova Guiné halai hosi konflitu sira hanesan iha Afeganistaun, Darfur, Somália ka Síria, no sira seluk buka halai hosi diskriminasaun ka kondisaun katak laiha nasionalidade, hanesan ema minoria sira rohingya, hosi Birmánia, ka bidun hosi rejiaun Golfo nian.

SAPO TL ho Lusa