Timor-Leste, Austrália ho petrolíferu sira konkorda fahe informasaun konfidensial

Governu sira Timor-Leste ho Austrália nian no reprezentante sira hosi petrolíferu sira ho konsesaun iha posu Greater Sunrise asina ona, iha loron-kuarta, akordu ida hodi fahe informasaun konfidensial relasionadu ho projetu iha Tasi Timor, hatete hosi fonte sira ne'ebé halo parte iha prosesu.

Akordu ne'e asina iha loron-kuarta liutiha loron rua hafoin reuniaun ne'ebé akontese ona iha sidade australianu Brisbane no ne'ebé partisipa ona delegasaun sira hosi Governu Austrália ho Timor-Leste nian (lidera hosi Xanana Gusmão) no hosi petrolíferu sira Woodside, ConocoPhillips, Royal Dutch Shell ho Osaka Gas, esplika ona ba Lusa.

"Hanesan akordu ida ne'ebé permiti ba parte rua hodi iha asesu ba "data room" ne'ebé iha informasaun konfidensial tomak hosi joint venture kona-ba posu Greater Sunrise no ne'ebé bele asede hodi nune'e parte rua bele defende sira nia opsaun", esplika hosi fonte.

Reuniaun sira hosi Brisbane - ida dahuluk ho petrolíferu sira - hala'o iha ámbitu hosi prosesu negosiasaun entre Timor-Leste ho Austrália, ho protesaun hosi Komisaun Konsiliasaun ida hosi ONU, hodi defini fronteira sira tasi nian ne'ebé maka hala'o ona durante besik tinan ida.

Iha fulan-Agostu nia rohan, Timor-Leste ho Austrália asina ona akordu kona-ba "elementu sentral sira" ba definisaun fronteira tasi sira nian no kona-ba estatutu legal ba dezenvolvimentu hosi posu gás Greater Sunrise nian iha Tasi Timor.

Akordu, ne'ebé iha futuru tuirmai sei transforma ba tratadu ne'ebé sei asina entre nasaun sira, halibur "elementu sentral sira hodi defini limiti sira fronteira nian iha Tasi Timor (...) ko'alia estatutu legal hosi kampu gás Greater Sunrise, estabelesimentu hosi rejimi espesial ida ba Greater Sunrise, dalan ida ba dezenvolvimentu hosi rekursu nian no fahe rezultadu sira ne'ebé hetan".

Asuntu úniku ne'ebé sei ko'alia maka iha ligasaun ho oinsá maka esplora gás, ho gazodutu ida ba Darwin, iha Teritóriu Norte Austrália nian, ka ba kosta-súl Timor-Leste nian. Destinu hosi gazodutu ne'e sei determina dalan oinsá reseita sira hosi rekursu sei fahe entre nasaun rua.

Kampu sira Greater Sunrise, lokalizadu iha tinan 1974, iha rezerva sira ne'ebé kalkula ho triliaun 5,1 tuir kúbiku ida gás nian no lokaliza iha tasi Timor, besik kilómetru 150 hosi sudeste Timor-Leste nian no kilómetru 450 hosi noroeste Darwin, Austrália.

Konsesaun hosi Greater Sunrise kontrola hosi Woodside (operador ho 33%) ne'ebé hamutuk ho ConocoPhillips, Royal Dutch Shell no Osaka Gas.

Akordu hodi fahe informasaun konfidensial asina ona hosi ministru Estadu Agio Pereira, númeru rua hosi delegasaun timoroan, hosi reprezentante ida hosi Governu australianu no hosi responsável sira petrolíferu nian.

"‘Data room' iha informasaun sira kona-ba aspetu sira hanesan rezerva sira, prospesaun sira, estudu tékniku sira no viabilidade nian. Ne'e sei permiti atu Timor-Leste bele uza mós informasaun hodi defende nia pozisaun iha negosiasaun sira", haktuir hosi fonte.

"Akordu permiti asesu no garanti uzu konfidensial hosi informasaun limitadu de'it ba kestaun ne'e", nia esplika.

Fonte ne'e mós hatete katak durante enkontru sira iha Brisbane, petrolíferu timoroan Timor Gap halo ona aprezentasaun ida kona-ba perspetiva hosi Timor LNG, ka gazodutu ida ba kosta-súl nasaun nian no espesialista sira hosi Joint Venture halo mós aprezentasaun ida kona-ba alternativu sira seluk ba esplorasaun.

Iha loron 16 Novembru reuniaun kontinua ho elementu sira hosi Komisaun Konsiliasaun nian, no iha faze dahuluk iha reuniaun hosi delegasaun sira hosi Governu rua no membru na'in lima hosi komisaun no hafoin ne'e, iha faze daruak, maka sei hamutuk ho petrolíferu sira.

Iha loron-kinta ne'e, iha Timor-Leste, grupu ida hosi veteranu no kombatente sira hosi luta ba independénsia no kontra okupasaun indonéziu asina ona deklarasaun konjuntu ida hodi apoia Xanana Gusmão, negosiador prinsipal ba kestaun fronteira tasi nian no defeza hosi opsaun ba gazodutu ida ba Timor-Leste.

SAPO TL ho Lusa