CNJTL Husu Lider Nasionál Hamutuk

DILI, (TATOLI) - Presidente Konselhu Nasionál Juventude Timor-Leste (CNJTL-sigla Portugés) Maria Dadi Magno husu atu lideransa Nasionál hamutuk hodi kaer metin valores luta ba ukun rasik aan hodi tane aas interese nasionál.

ʺHusu ba Lider Kay rala Xanana Gusmão, Mari Alkatiri, Jose Ramos Horta, Taur Matan Ruak, Lere Anan Timur hodi kaer metin prinsípiu no valores ukun rasik aan, hodi tane aas interese nasionál no estabilidade nasionál, ʺ Maria Dadi Magno husu liuhusi Prezidente Repúblika, Francisco Guterres Lú Olo, Durante diálogu ho Xefe Estadu iha Palásiu Prezidensiál Bairru-Pité, Tersa, (4/12).

CNJTL mós lori Organizasaun Masa hanesan OJETIL, Juventude Partidu Polítiku no seluk tan husu mós ba  Xefe Estadu atu foti desizaun tuir mandatu konstitusionál hodi hapara tensaun polítika ne’ebé akontese.

ʺAmi husu ba Presidente Repúblika no Lider Partidu Polítika sira hotu atu iha boa fé hodi estabelese negosiasaun ho bloku koligasaun no aliansa Maioria Parlamentár, hodi asegura governu ida consensual, hodi garante unidade nasionál, atu nune’e bele responde situasaun agora,” Dadi Magno tenik.

Iha fatin hanesan Prezidente Repúblika promete, sei foti desizaun tuir konstituisaun hodi la fó impaktu ba povu.

ʺHa’u husu ba joven sira atu mantein pás no estabilidade iha rai laran, demokrasia maka tenke la’o nune’e duni tanba ne’e povu labele lakon esperansa, tanba ita sei to’o iha solusaun ida,ʺ Prezidente Francisco Lú Olo promete.

Tuir Prezidente Repúblika, situasaun polítika ne’ebé akontese iha ona hanoin ba futuru, atu halo tranzisaun podér ida ba jerasaun foun ho seguru, estavel, pasífiku atu hatutan ukun husi jerasaun tuan.

ʺIda ne’e maka Presidente Repúblika nia hanoin, no ami rekoñese joven sira nia potensialidade atu sai lideransa iha país ida ne’e iha tinan 5 no 10 mai oin,ʺ Lú Olo enkoraja.

Maibé, Tuir Lú Olo antes atu entrega ukun ida ne’e jerasaun tuan sei kria kondisaun ba joven sira hodi la’o tuir ukun ne’ebé jerasaun tuan  halo ona  durante tinan barak.

Atu solusiona problema ne’ebé iha (Governu Vs AMP) Lú Olo sei valoriza opiniaun hosi lider nasionál sira hotu hodi la inkilina ka defende ida hodi hatún seluk.

ʺLa foti ida no la hatún ida, la hasae ida no hatún ida, maibé prezidente hakarak atu kaer sira hanesan, para nune’e ita hamutuk atu hateke ba oin hodi ultra pasa situasaun ne’e hodi fó nafatin esperansa ba ita nia povu,” Xefe do estadu realsa.

Jornalista: Agapito dos Santos | Editór: Manuel Pinto