Prado Foun Hela De’it ho Mehi

DILI: Prezidente Repúblika, Francisco Guterres ‘Lú-Olo’ ofisialmente deklara hodi disolve Parlamentu Nasionál no hakat ba eleisaun antesipada.

Liu husi dekretu Prezidente Repúblika númeru 5/2018, 26 Janeiru, Xefe Estadu uza ninia kompeténsia tuir Konstituisaun RDTL Artigu 74 pontu 1 kona-ba “Prezidente Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár”.

Nune’e, halo mós konsultasaun ho partidu polítiku sira ne’ebé hetan reprezentasaun iha Parlamentu Nasionál tuir artigu 86 pontu f hodi disolve Parlamentu Nasionál.

Nune’e, bazeia ba deliberasaun Konsellu Estadu ho númeru 01/2018, 24 Janeiru, pronunsia situasaun polítika foun hodi halo hikas eleisaun antesipada.

Ho desizaun Xefe Estadu nian mehi deputadu foun na’in 65 ne’ebé vota afavór ona ba Prado foun hela mehi de’it. Tanba, la kleur tan povu sei hakat hikas ba urna hodi halo votasaun hili membru deputadu 65 foun.

Deputadu na’in 65 foun ne’e liu husi sira nia reprezentante sira husi Bankada FRETILIN, CNRT, PLP, PD no KHUNTO iha fuan Setembru 2017, ho “konxiencia” vota unanimidade ona ba karreta Prado foun.

Konsellu Administrativu Parlamentu Nasionál nian reprezenta husi kada bankada. Husi Partidu FRETILIN reprezenta husi deputadu Aurélio Freitas, CNRT Deputada Brígida Correia, PLP, Deputadu Mericio Akara, PD, Deputadu Manuel Carvalho no reprezentante husi bankada KHUNTO.

Iha prosesu diskusaun no votasaun ne’e pontu rua importante mak deputadu sira define. Kona-ba kontinuasaun alienasaun ba karreta Prado antigu.

Nune’e, karreta sira ne’ebé deputadu anteriór sira lori ona ba uma sei rekolla hotu, hafoin bele halo analiza hodi define ninia presu ne’ebé razoavel. Presu ne’ebé determina entre $12.000 to’o $20.000.

Pontu importante seluk ne’ebé aprova maka reprezentante bankada sira ne’e hotuhotu a favór ba sosa karreta foun.

Maski nune’e, planu deputadu sira nian atu sa’e Prado foun labele realiza. Orsamentu atu sosa karreta ne’e pendente hamutuk iha Orsamentu Jerál Estadu (OJE), ne’ebé labele diskute hafoin mosu impase polítika.

Nune’e, deputadu sira sente de’it kadeira mamar durante fulan, ne’ebé posivel sei aumenta fulan hirak tan ba oin to’o mosu lejizlasaun foun no imajinasaun atu uza Prado foun hela de’it ho mehi.  

Independente