Eis-Prezidente ho atuál ministru
timoroan José Ramos-Horta konsidera koligasaun boot hosi forsa sira opozisaun
timoroan nian hanesan "absordu polítiku" ida ne'ebé evidensia
diferensa programátiku boot no "insatisfasaun" kona-ba lista hosi
kandidatura sira ba eleisaun antesipadu sira iha fulan-Maiu.
"Ha'u la haree firmeza ruma
iha koligasaun. Bele iha vontade individual maka'as, iha nível hosi Xanana
[Gusmão] no hosi Taur Matan Ruak. Maibé hanesan pontual no sei to'o iha
ne'ebé?", kestiona hosi José Ramos-Horta, ministru Estadu iha Governu
atual ne'ebé lidera hosi Frente Revolucionária do Timor-Leste Independente
(Fretilin) ho Partidu Demokrátiku (PD), iha deklarasaun sira ba ajénsia Lusa.
"Tanba diferensa maka'as
ne'ebé maka mosu iha koligasaun ne'e nia laran, sei dura tempu hira? Koligasaun
tolu ka to'o 13 hanesan absordu polítiku kompletu, la hanoin iha implikasaun
sira ka konsekuénsia sira", hatete hosi Ramos-Horta ne'ebé halo parte hosi
Governu atual hanesan independente.
Forsa opozisaun tolu - Congresso
Nacional da Reconstrução Timorense (CNRT), lidera hosi Xanana Gusmão, Partidu
Libertasaun Popular (PLP), lidera hosi Taur Matan Ruak ho Kmanek Haburas
Unidade Nacional Timor Oan (KHUNTO) - harii ona bloku maioritáriu ida iha
parlamentu nasional atual, hafoin kedas tomada pose hosi Governu atual.
Aliansa Maioria Parlamentar (AMP)
ne'ebé foin lalais ne'e muda ona ba Aliansa ba Mudansa no Progresu (AMP), naran
ne'ebé maka partidu tolu hakarak aprezenta, unidu, ba eleisaun sira ne'ebé
previstu ba loron 12 Maiu. AMP bele hamutuk mós ho forsa polítika sira seluk
ne'ebé ki'ik liu.
"Iha diferensa maka'as hosi
programa entre sira. Tanba ne'e iha desgostu iha PLP nia laran, iha barak,
ne'ebé inklui juventude, halai hosi CNRT hodi ba vota iha PLP hanesan votu
protestu relasionadu ho CNRT. Provável liu maka sira fila ba PD ka ba
Fretilin", Ramos-Horta hatete.
Hanoin iha eleisaun antesipadu,
Ramos-Horta antesipa katak Fretilin haree nia apoiu aumenta tanba "agora
iha liután vantajen duké partidu ruma".
"Ha'u haree posibilidade ba
vensedor rua, ne'ebé maka Fretilin ho PD. Iha ha'u nia observasaun, no ha'u
mantén pozisaun ida neutro iha ne'e, ha'u haree simpatia maka'as no respeitu ba
Mari Alkatiri [primeiru-ministru], ba korajen hodi nia aguenta fulan hirak hosi
impaktu boot", nia konsidera.
Iha eleisaun tinan 2017, PLP halo
ona kampaña ida ne'ebé marka ho krítika maka'as ba CNRT no ba nia polítika
sira, ho tensaun polítika entre Taur Matan Ruak ho Xanana Gusmão, ne'ebé nia
diferensa sira agora hanesan rezolvidu ona, ho vídeo "rekonsiliasaun"
ida entre sira na'in rua ne'ebé maka fahe iha rede sosial sira.
Prosesu tomak formasaun AMP nian
akontese lahó prezensa Xanana Gusmão nian iha Timor-Leste, ne'ebé dezde loron
11 Setembru iha estranjeiru hodi lidera ekipa timoroan ne'ebé halo ona negósiu
ba tratadu foun ida kona-ba fronteira tasi nian ne'ebé sei asina iha
fulan-Marsu.
CNRT ho PLP garanti ona ba
jornalista sira katak diferensa programátiku sira sei rezove no katak kestaun
sira hosi lista mós, hatudu frente unidu ida ne'ebé maka líder istóriku sira
Xanana ho Taur Matan Ruak, no fundador KHUNTO nian, José Naimori, mosu hamutuk
iha logo foun koligasaun nian.
Maibé, Ramos-Horta garanti katak
"iha ona insatisfasaun boot iha fileira sira PLP ho CNRT nian kona-ba
posibildiade ba lista kandidatura nian" tanba "seidauk hatene katak
balun hosi na'in 22 ne'ebé eleitu hosi CNRT sei fó fatin ba na'in ualu hosi PLP
ka sira ne'e sei tama iha lista hafoin sira hosi CNRT nian".
Nia hatete katak dúvida sira ne'e
maka halo Prezidente Repúblika hili eleisaun antesipadu no la'ós konvida
opozisaun hodi harii alternativu ba Governu.
"PR iha responsabilidade
ne'e: bainhira konvida alternativu tenki fó garantia katak bele moris ho governabilidade
di'ak durante tinan lima no naturalmente katak sira labele fó", nia
afirma.
Tensaun polítika ne'ebé maka
Timor-Leste hasoru iha fulan barak nia laran hamosu mós debate antigu sira iha
sosiedade timoroan, ho rede sosial sira marka ho referénsia sira ba diferensa
sira entre frente armada ho frente diplomátika hosi luta hasoru okupasaun indonézia.
Militante balun ne'ebé iha
ligasaun ba partidu sira opozisaun nian no to'o artigu balun iha imprensa
timoroan sujere atu eleisaun antesipadu, ne'ebé previstu ba fulan-Maiu, tau
hamutuk mane sira hosi frente armada, hanesan Xanana Gusmão ho Taur Matan Ruak
- líder sira hosi partidu boot opozisaun nian, CNRT [Congresso Nacional da
Reconstrução Timorense] ho PLP [Partidu Libertasaun Popular] -, no líder sira
hosi frente diplomátiku, hanesan Mari Alkatiri ho José Ramos-Horta, hamutuk iha
Governu.
"Hanesan perigozu. Hanesan
la honestu. Signifika katak nega veteranu barak iha Fretilin, ne'ebé maka uluk
iha foho. Nega kontribuisaun hosi Renetil [parte juvenil hosi rezisténsia nian]
iha PD, kolaborasaun hosi sira ne'ebé hanesan ona vítima hosi tortura. Bele
halo de'it hosi ema oportunista no laiha responsabilidade", nia afirma.
José Ramos-Horta subliña katak
hahalo sira ne'e hanesan hosi "minoria" ida no katak líder istóriku
sira, hanesan Xanana Gusmão, Taur Matan Ruak ka Lere Anan Timur, "nunka
apoia manipulasaun sira hanesan ne'e".
SAPO TL ho Lusa
Sem comentários:
Enviar um comentário