Tratadu foun hosi fronteira tasi
nian entre Timor-Leste ho Austrália, asina iha loron-kuarta, hamenus risku ba
investidor sira no loke odamatan ba benefísiu importante sira ba ema timoroan
sira, afirma hosi ministru timoroan ne'ebé asina dokumentu.
"Ne'e hanesan loron istóriku
ida. Kapítulu ida importante tebes ne'ebé hahú ho ita nia líder sira sai
konsiente hosi responsabilidade sira ne'ebé iha ligasaun ba tratadu ne'e. Ita
hatene katak tenki halo buat barak hafoin loron ohin nian maibé buat ne'ebé ita
hakarak hetan bainhira hahú prosesu rekonsiliasaun ne'e maka hetan ona:
fronteira marítima permanente ida", hatete hosi ministro Adjunto do
primeiro-ministro timorense para a Delimitação de Fronteiras, Agio Pereira, iha
konferénsia imprensa ida iha sede ONU nian.
"Akordu ne'e hatudu klaru ba
nasaun rua fatin fronteira nian. Tratadu defini fronteira permanente sira no
ne'e hamenus risku hodi investe iha rekursu sira hosi rejiaun", nia
hatutan mós.
Agio Pereira ko'alia iha
konferénsia imprensa ida hamutuk ho ministra Negósiu Estranjeiru australiana,
Julie Bishop, hafoin sira na'in rua asina "Tratadu entre Austrália ho
Repúblika Demokrátika Timor-Leste ne'ebé estabelese nia limiti marítimu sira
iha Tasi Timor".
Ministru timoroan subliña
prezensa iha serimónia hosi sekretáriu-jeral ONU nian, António Guterres,
"belun besik ida" Timor-Leste nian ne'ebé "fó hakat maka'as ida
hodi tulun independénsia Timor-Leste nian" no ne'ebé prezente iha loron
ohin iha "akontesimentu istóriku importante tebes ida" ba ema
timoroan sira.
Kona-ba dezenvolvimentu hosi
kampu petrolíferu Greater Sunrise - aspetu ne'ebé seidauk iha akordu - Julie
Bishop hatete katak opsaun ruma hosi opsaun rua ne'e, sei lori "benefísiu
boot ba Timor-Leste", disponibiliza atu Austrália kontinua apoia
Timor-Leste iha negosiasaun sira ho petrolíferu sira.
"Ita ko'alia daudaun kona-ba
dolar biliaun resin durante projetu ne'e nia moris", Bishop hatete.
"Opsaun sira tenki hanoin
iha viabilidade ekonómiku iha tempu naruk. Austrália nia interese hanesan
garantidu ho dezenvolvimentu hosi rekursu ba benefísiu Timor-Leste nian.
Hanesan ami nia interese atu Timor-Leste sai hanesan viziñu estável no prósperu
ida, no tanba ne'e ami hakarak haree projetu ida ne'ebé viável iha nível
ekonómiku iha tempu naruk hodi fó benefísiu máximu ba Timor-Leste", nia
konsidera.
Agio Pereira repete fali vontade
atu opsaun maka gazodutu ida ba súl Timor-Leste nian hodi konsidera katak sei
iha impaktu "transformativu ida, ekonómiku no sosialmente", ba
populasaun ne'ebé maioria joven no hodi harii konfiansa iha nasaun.
"Bainhira investidor sira
haree katak Timor-Leste konsege jere indústria kompleksu ida hanesan
'downstream', harii gazodutu ida no unidade LNG, sei konfia katak Timor-Leste
sei halo buat barak liután", hatete hosi ministru timoroan.
Xefe diplomasia australiana
hatete katak tratadu ho Timor-Leste la afeta tratadu ne'ebé ezisti antes ho
Indonézia, hodi esplika katak ko'alia ona ho nia homólogu iha Jakarta ne'ebé
"felisita Timor-Leste ho Austrália kona-ba tratadu".
"Tratadu entre Austrália ho
Indonézia mantén. Tratadu ne'e loke dalan ba Timor-Leste ho Indonézia halo
ko'alia kona-ba fronteira sira. Ne'e sei iha impaku lalais hodi adapta
fronteira sira ba leste no oeste tratadu nian, ne'ebé maka previstu ona",
nia afirma.
Bishop felisita "akordu
istóriku" loron-tersa nian, importante iha nível bilateral no mós
"iha termu sira direitu internasional nian" agora falta de'it hetan
akordu kona-ba Greater Sunrise.
Agio Pereira refere ona kata
maski hosi konfuzaun sira iha negosiasaun sira, akordu hatudu susesu iha
negosiasaun sira, Bishop afirma katak "Austrália rejeita sujestaun rua
katak atua ho dalan ne'ebé maka ladi'ak".
SAPO TL ho Lusa
Sem comentários:
Enviar um comentário