Taur: Ha’u ho Xanana sei moris laiha ida ukun Timor

Portavos Aliansa Mudansa ba Progresu (AMP) Taur  Matan Ruak hateten, enkuantu nia ho Kay Rala Xanana Gusmão, sei moris, sei la fo tempu ba ida atu ukun nasaun  ne’e.

“Imi hatene  iha fatin-fatin Xanana ami nain rua dehan, enkuantu Xanana ami nain rua sei moris laiha ema ida sei ukun Timor, bele halo to’o  iha ne’ebé,” deklara Portavos AMP, Taur Matan Ruak, Kinta (26/04/18), liu husi mini kampaña  iha Suku Larisula, Postu Administrativu Baguia, Munisipiu Baucau.

Taur Matan Ruak dehan, tempu  rejistensia de’it Indonesia, labele doko nia ho Xanana.

“Imi hare’e Indonesia nasaun bo’ot doko ami nain rua Xanana la ba, la’os agora funu hotu imi doko ami nain rua Xanana, satan alin Naimori mai tan,” dehan Taur Matan Ruak.

Tanba ne’e , Taur  husu militante AMP no povu Larisula oan atu vota ba AMP, hodi kaer ukun  iha oitavu Governu Konstituisional.

“Ha’u nia inan aman sira iha Larisula husu ba imi, imi bele dada bandera FRETILIN ho PD   iha imi nia uma, mas eleisaun antesipada ne’e imi vota ba AMP,” dehan Taur Matan Ruak.

Taur Matan Ruak  dehan, elesiaun jeral tinan   2002 FRETILIN    manan kadera  55  iha Parlamentu Nasional (PN), maibe saida mak akontese iha tinan lima nia laran FRETLIN  hari’i  Governu ba dala 3.

Taur  hatutan, iha  tinan 2007 partidu mais  votadu, Prezidente Republika Jose Ramos Horta fo fulan ida ba lider sira FRETILIN atu buka koligasaun, maibe fulan ida ema  halai  hotu, saida  mak akontese Prezidente Republika Ramos Horta foti  fo tiha ba CNRT.

Tanba  ne’e FRETILIN dehan CNRT asalta poder  de faktu temi naran oin-oin, maibe CNRT ukun. Ne’e FRETILIN gagal ba dala rua.

Depois eleisan jeral   2017, FRETILIN mais  votadu  buka  ema atu halo koligasaun,  la hetan masimu, tanba  ho de’it kadera 30, ne’e gagal ba dala tolu.

Agora FRETILIN ho numeru 4 sei gagal tan ba dala 4. Tanba  ne’e imi nia votu ne’e soe  de’it ba tasi.

“Imi nega ha’u , ha’u sei putus ho imi, ne’e ha’u dehan ba imi, maun Xanana ema diak, ha’u lae, matan Ruak Jeneral paling gila di Asia Pasifik,” dehan Taur Matan Ruak.

Mini kampanha AMP, iha Suku Larisula,Postu Administrativu Baguia  hetan seguransa husi PNTL Baguia, F-FDTL no  hetan observasaun  husi CNE no observador Internasional. Avi

GMN TV | Grupo Média Nacional