Imigrasaun Kontinua Detein Sidadaun Estranjeiru Viola Vistu Servisu

DILI, (TATOLI) – Diretór Operasaun Servisu Imigrasaun, Inspetór Xefe Fortunato Guterres, hateten rezultadu inspesaun to’o semana ne’e kontinua detein sidadaun estranjeiru ne’ebé uza vistu turista hodi servisu iha Timor-Leste.

Servisu imigrasaun rejista hosi janeiru to’o semana ne’e konsege detein sidadaun rai-liur hamutuk 337, maiória hosi Indonézia, Xina, Filipina no seluk.

ʺProsesu administrasaun la’o ona hodi selu multa, balun haruka ba Ministériu Públiku tanba kategoria krimeʺ, hatete ba jornalista sira nia Ministeriu Defesa no Seguransa Villa Verde Dili, ohin.

Fortunato esplika tuir lei imigrasaun regula sidadaun rai-liur  ne’ebé viola vistu no empregadór ne’ebé fó servisu tenke multa ba Estadu hahú $250 to’o rihun resin.

Sidadaun estranjeiru hirak ne’e maioria servisu iha área konstrusaun, otél, loja no seluk tan.

Maibé nia promete servisu imigrasaun sei kontinua halo inspesaun hodi prevene sidadaun rai liur viola vistu hodi servisu iha rai laran.

Jornalista: Agapito dos Santos | Editora: Rita Almeida

Imajen: Diretór Operasaun Servisu Imigrasaun, Inspetór Xefe Fortunato Guterres. Foto Egas Cristovão