SEKOMS no Embaixada Xina Ko’alia Dijitalizasaun Sistema Televizaun

DILI, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis “Akara”, hetan vizita kortezia husi koselleiru asuntu ekonomia no komersiál embaixada Xina, Zhenhua Liu, hodi ko’alia kona-ba dijitalizasaun sistema televizaun iha Timor-Leste.

Mericio afirma tanba Governu foun reprezentante embaixada Xina hakarak hasoru malu no introdús sira-nia planu ba SEKOMS nomós haree fila fali kooperasaun komunikasaun ne’ebé durante ne’e hala’o ona.

“Hanesan komunikasaun iha ona kooperasaun nivel diplomátiku, entaun sira téknikamente hakarak husu oinsá iha kestaun operasionál, implementasaun. Sira mai ne’e foku liu ba dijitalizasaun sistema televizaun iha ita-nia rai, entaun ne’e liga mai área Sekretáriu Estadu Komunikasaun Sosiál, sira hakarak ko’alia ho ita oinsá planu dijitalizasaun televizaun ida ne’e”, Mericio ba jornalista sira iha Palásiu Governu, ohin.

Aleinde ne’e informa mós progresu komunikasaun durante ne’e ho Governu no sekretáriu Estadu sesante sira no oinsá atubele kontinua bá oin ka la’e, tanba ne’e hanesan ajuda ida husi sira mai Timor-Leste.

“Ha’u dehan ba sira ne’e Governu foun ita sei haree saida mak durante ne’e la’o ona, ita-boot sira-nia komunikasaun ho sekretáriu Estadu uluk no ha’u dehan sei estuda kona-ba projetu dijitalizasaun sistema foun ida ne’e. Ne’e hanesan vizita prelimináriu ne’ebé seidauk deside buat ida, laiha konkordánsia iha aspetu espesífiku ruma”, eis deputadu ne’e dehan.

SEKOMS apresia inisiativa husi embaixada Xina hodi apoia, maibé iha kestaun operasionál tenke fó tempu atu estuda no haree vantajen no dezvantajen ba país depois haree iha etapa tuirmai.

Iha soru-mutu ne’e embaixada Xina atualiza en jerál katak sira sempre iha programa haruka timoroan bá tuir formasaun iha Xina nomós sira interese atu apoia dijitalizasaun televizaun nian ne’e hanesan programa boot ida.

“Ba sira prontu no lalais di’ak liu hanesan sira-nia prinsípiu oinsá dezenvolvimentu ne’e la’o lalais, mas ba ita hanesan nasaun ki’ik nomós Governu foin semana ida tenke haree. Se iha kooperasaun liuliu iha sistema sira hanesan ne’e tenke haree nia pontu pozitivu no risku sira ne’e hotu maski ita apresia.”

Governante ne’e hatutan embaixada Xina preparadu hela, maibé Governu sei tetu bainhira deside ona maka sira avansa.

Jornalista: Maria Auxiliadora | Editora: Rita Almeida

Imajen: SEKOMS, Merício Juvenal dos Reis “Akara”, hetan vizita kortiza ida husi koselleiru asuntu ekonomia no komersiál embaixada Xina, Zhenhua Liu. Foto/António Gonçalves.