Diskute OJE Tenke Iha Lei Orgániku Governu

DILI, (TATOLI) – Premiadu Nobel ba Pás, José Ramos Horta, hatete Lei Orgánika Governu oras ne’e iha Prezidente Repúblika nia liman ho esperansa bele promulga molok diskusaun ba Orsamentu Jerál Estadu (OJE) 2018.

Horta hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, kinta (9/8), hafoin rona Prezidente Repúblika, Francisco Guterres Lú Olo, nia opiniaun kona-ba impase polítika rai-laran.

Tuir eis Prezidente-Repúblika ne’e atu hahú debate kona-ba OJE, tenke iha Lei Orgánika Governu, tanba lei ne’e maka bele defini kna’ar kada ministru ne’ebé responsabiliza ba ministériu sira iha atuál Governu.

Nia hatutan diálogu entre Xefe-Estadu no Xefe-Governu kontinua la’o para hetan solusaun ba problema balun ne’ebé maka pendente, maibé nia lakohi komenta liu-tan, tanba ne’e kna’ar hosi Prezidente no Primeiru-Ministru.

“Ha’u bele iha opiniaun ruma oinsá maka atu rezolve problema ne’ebé maka pendente (lista kandidatu membru Governu) para bele hetan dalan. Maibé, ha’u haree Primeiru-Ministru halo hela esforsu no la kle’ur tan sei hetan solusaun”, Horta tenik.

Kona-ba kandidatu membru Governu, Kay-Rala Xanana Gusmão, ne’ebé rezigna hosi kandidatura, Horta hatán seidauk enkontru direta ho Xanana Gusmão maibé buat ne’ebé nia rona maka Xanana hakarak kaer asuntu fronteira terreste, marítima, greater sunrise, no dezenvolvimentu kosta súl.

“Se ida ne’e maka Xanana hakarak halo, ha’u hanoin ne’e esensiál tebes, tanba futuru rai ida ne’e atu la’o ba oin tenke rezolve greater sunrise, fronteira sira no dezenvolvimentu kosta súl”, eis Primeiru-Ministru haklaken.

Jornalista: Xisto Freitas | Editora: Rita Almeida

Imajen: Premiadu Nobel ba Pás, José Ramos Horta