Antigu kuadru rejistensia,
no veteranu libertasaun nasional, Rejiaun Administrativa Espesial
Oe-cusse Ambeno (RAEOA), husu ba Primeiru Ministru (PM), Taur Matan Ruak, atu
hapara Prezidenti Autoridade Oe-cusse, Mari Alkatiri ho nia estrutura tomak husi
Oe-cusse urjenti, tanba durante Alkatiri nia prezensa tinan hira ona iha
Oe-cusse, halo povu atoni tristi no sai vítima ba nia desizaun sira hotu.
Veteranu Oe-cusse mós ezije ba
Primeiru Ministru Taur Matan Ruak atu halo investigasaun ba Sekretáriu Rejional
Terras no Propriadade Ordenamentu Teritóriu OE-cusse, Pedro Xavier de Sousa,
kona ba plantasaun no komunidade, ba indemnizasaun komunidade afetadu husi
projetu ZEESM Oe-cusse.
Ami abaixu asinadu nu’udar
antigu kuadru rezistensia no veteranu libertasaun nasional, no mós
responsavel ba kaixa klandestina, husu ba Primeiru Ministru atu hapara imediatamente
funsaun sira ne’ebé Mari Bin Amude Alkatiri okupa iha Rejiaun Administrativa
Espesial Oe-cusse Ambeno (RAEOA), no Zona Espesial Ekonomia Sosial Merkadu
(ZESSM), hodi loke dalan ba auditoria ida independente, justu no kredível. Husu
mós auditoria ida husi instituisaun internasional ruma, embora ho kustu bo’ot
hodi investiga iregularidade ne’ebé povu Oe-cusse hasoru iha nia rain rasik,” katak
veteran Antoninho da Cunha ba jornlista liu husi konferensia Imprensa ne’ebé
hala’o iha Suku Costa, RAEOA, Kinta (09/08).
Veteranu Oe-cusse sira husu atu
halo auditoria ba ZEESM Oe-cusse, tanba formasaun autoridade RAEOA, kompostu
husi Sekretáriu Rejional nain 7, ne’ebé maioria husi partidu FRETILIN, no
nain ida husi partidu CNRT, maske CNRT mak partidu Governamental.
Veteranu sira ne’e dehan, durante
Alkatiri nia prezensa iha Oe-cusse, hapara kargu diresaun no xefia sira, maske
sira-nia mandatu seidauk hotu. Alende ne’e, falta konsiderasaun ba despaixu no
termu posse husi Prezidenti Komisaun Funsaun Públika, nomeia fali ema foun hodi
priense kargu sira ne’e, tan de’it tau interese partidu nian aas liu interese
nasaun no povu.
Prezidenti Autoridade RAEOA no
ZEESM, durante nia mandatu, seidauk kria lei orgánika atu implementa lei númeru
3/2014, maibé Mari Alkatiri uza nia poder hodi orienta no fó instrusaun ba nia
estrutura tomak iha RAEOA tuir nia hakarak.
“Suspende pagamentu pensaun ba
veteranu 156, ne’ebé liu ona prosesu verifikasaun, no hetan ona aprovasaun husi
Komisaun Omenajen, bazeia ba lei númeru 3/2006, 12 Abril. Halo transferensia ba
funsionáriu públiku, tanba odio no vingansa, tanba veteranu sira iha Oe-cusse asina
karta protesta ida antes,”dehan Antoninho.
Nia haktuir, halo rekrutamentu ba
funsionáriu kontratadu iha RAEOA la tuir lei númeru 8/2004, kona ba estatutu
funsaun públika. Forma konsellu konsultivu husi partidu FRETILIN de’it,
implementasaun dekretu lei númeru 25/2016 ba kargu diresaun no Xefi sira la
tuir prosediamentu, tanba involve ema ne’ebé la’os funsionáriu públiku.
“Ami husu ba Primeiru Ministru,
atu hapara prosesu rekrutamentu foun ba funsionáriu kontradu iha instituisaun
SAS, Edukasaun, Portu Marítima, Aeroportu, no instituisaun seluk ne’ebé iha
RAEOA hahú iha loron 1/08/2018, tanba objetivu husi rekrutamentu ida ne’e hodi reforsa
propaganda polítika partidu FRETILIN nian, tanba sira fiar katak, sei iha tan
segundu eleisaun antesipada iha tinan ne’e,”dehan Antoninho.
Veteranu Oe-cusse sira mós husu
ba PM Taur Matan Ruak atu investiga diretor sira ne’ebé hamutuk halo koru iha
Oe-cusse hanesan trio MaLeoBa (Mari, Leonia Bano), hodi hanehan nia konteranus
Atoni iha sira-nia rain rasik.
“Ami mós husu ba Primeiru
Ministru atu investiga Pedro Xavier de Sousa, Sekretáriu Rejional Terras no
Propriadade no Ordenamentu Teritóriu, kona ba indemnizasaun ba rai, plantasaun
no uma komunidade, tanba hetan afetasaun husi projetu ZEESM,” dehan Antoninho.
Bainhira jornalista sira tenta
atu konfirma ho Prezidenti RAEOA, Mari Alkatiri, nia Sekretária hateten katak,
dadauk ne’e Mari Alkatiri, laiha tempu atu hasoru jornalista hodi fó
resposta, tanba okupadu ho servisu, maibé Alkatiri sei responde ida ne’e liu
husi komunikadu ida ba media hotu. Cos
GMN TV | Grupo Média Nacional
Sem comentários:
Enviar um comentário