Moras mental presiza atendimentu diak husi pesoal saúde

Vise Ministru Saúde Asuntu, Dezenvolvimentu Planu Extrateziku Saúde, Bonifacio Maucoli dos Reis, apela ba responsavel sentru tratamentu moras mental Hospital Nacional Guido Valadares (HNGV) atu fo atendimentu diak ba pasiente moras mental sira, tanba sira presiza pesoal saúde sira-nia atensaun.

“Ohin ita halo inaugurasaun ba kuidadu alguda ne’ebé ho objetivu atu simu ita-nia pasiente sira ne’ebé mak mai ho moras phisiko-sosial, liu-liu ba sira ne’ebé mak moras mental ne’ebé fatin ne’e atu utilija ba observasau no tratamentu tanba ne’e ita husu ba mediku sira atu fo tratamentu ne’ebé mak diak ba ita nia pasiente sira ho moras mental tanba sira ne’ebé mak mai iha ne’e presija ita nia atensaun”,Vise Ministru Saúde Asuntu Dezenvolvimentu Planu Estrateziku Saúde, Bonifacio Maucoli dos Reis, apela ba médiku sira hafoin inaugura Sentru Tratamentu Moras Mental, no postu seguransa Polisia Nasional Timor Leste (PNTL) iha HNGV Bidau, Díli, Sesta 17/8/2018).

Vise Ministru Saúde, Asuntu Dezenvolvimentu Planu Estrateziku Saúde, Bonifasio Maucoli, hato’o haktuir,pesoal Saúde sira tenki fo tratamentu ne’ebé mak diak ba pasiente sira ho moras mental ne’ebé mak mai iha Sentru Tratamentu refere nune’e bele rekopera lalais sira-nia saúde.

“Médiku sira ne’ebé mak sei toma konta ba ida ne’e, ha’u husu atu fo tratamentu ne’ebé mak diak no kuidadu, fo akonsellamentu ne’ebé mak diak hatudu ita-nia simpatia, ita-nia prazer ba sira para sira bele rekopera sira-nia saúde lalais”, dehan Bonifácio.

Nune’e mos, Diretor Ezekutivu Hospital Nacional Guido Valadares, Aniceto Bareto, hateten, HNGV iha ona pesoal saúde ne’ebé mak sufisiente atu utiliza sentru refere hodi fo tratamentu ba pasiente ho moras mental ne’ebé presiza tratamentu.

“Durante ne’e ita kuaze atende iha emerjensia de’it, ne’ebé ita senti ladun dignu, tanba ne’e governu planu hodi loke fatin ida ne’e atu fo tratamentu ba sira ne’ebé moras mental aresivu nomos moras mental sira seluk, no agora dadauk ita iha médiku espesial ba moras mental nian nain rua, médiku jeral ida ne’ebé mos iha ona esperiensia kuaze tinan barak nain ida, ita mos iha enfermeiru ida ne’ebé mos ativu iha área ne’e iha ne’eba, ne’ebé prontu atu atende ita-nia pasiente maibe ita mos presiza tan pesoal para reforsa,”dehan nia.

Tuir dadus ne’ebé mak HNGV iha, pasiente ho moras mental ne’ebé durante ne’e HNGV simu kada fulan hamutuk 120 to’o 140. Entretantu total orsamentu ba konstrusaun Sentru Saúde inklui fasilidade hamutuk US$370.000. Ola

GMN TV | Grupo Média Nacional