terça-feira, 18 de setembro de 2018

PN La Autoriza Dezlokasaun PR Ba Estranjeiru

PARTILHAR

DILI, (TATOLI) – Parlamentu Nasionál (PN) liuhosi sesaun plenária Tersa, deside kansela dezlokasaun Prezidente Repúblika (PR), Francisco Guterres Lú-Olo, ba estranjeiru ho razaun pedidu asentimentu ne’ebé aprezenta hosi PR mai ho karater pakote.

Ho ida ne’e PN deside kansela dezlokasaun PR ba estranjeiru, Estadus Unidos Amerika ho votu kontra hosi deputadu na’in 33, no na’in 25 mak afavór e abstensaun zero, ho rezultadu votu refere PR la bele halo vizita ba estranjeiru.

Projetu Rezolusaun no. 11/v/1a konaba dezlokasaun PR, Francisco Guterres Lú-Olo, bazeia ba pedidu asentimentu auzénsia Xefe Estadu, husi territóriu nasionál iha loron 21 Setembru to’o 3 Outubru, tanba  hetan konvite husi Sekretáriu Jerál Organizasaun Nasoens Unidas (ONU), António Guterres hodi partisipa iha 73a  sesaun Asembleia Jerál ONU nó mós atividade oin-oin husi sesaun ne’e, hanesan Simeira Dame Nelson Mandela no enkontru bilateral oin-oin.

Prezidente Parlamentu Nasionál (PPN), Arão Noe informa pedidu husi PR mai pakote ho viajen estadu no trabalhu seluk husi Setembru to’o Dezembru, maibé PN tenke aprova rezolusaun ba kada dezlokasaun bazeia ba pedidu.

“Ida ne’e akontese antes ona iha tinan barak nia laran, kada dezlokasaun, Parlamentu tenke aprova rezolusaun ida bazeia ba pedidu PR. Tanba  ne’e pedidu bele mai hamutuk, maibé asentimentu ba kada dezlokasaun”, Arão esplika.

Deputada Carmelita Moniz husi bankada CNRT hateten ida ne’e hanesan pedidu daruak husi PR, atu PN bele fó asentimentu ba vizita estranjeiru hanesan polítika diplomasia internasionál.

“Prinsipálmente vizita ne’e importante, maibé ita mós presiza hanoin orsamentu ne’e, tanba  até ohin loron PR seidauk promulga OJE 2018, entaun ho osan husi ne’ebé mak PR atu halo viajen? Ha’u ho kolega balun mós halo proposta ba viajen PR”, tenik.

Deputada Maria Angelina Sarmento husi bankada PLP  konsidera viajen PR ne’e importante, mas seidauk oportunu atu PN halo asentimentu, tanba sei iha asuntu balun mak importante kabe ba responsabilidade Xefe Estadu.

“Fó pose ba restu kandidatu membru governu no promulgasaun OJE 2018, ita hotu hatene katak iha final fulan Setembru ne’e saldu iha tezouru mós la kabe para sustenta mákina estadu inklui kobre viajen PR. Ita tenke hatene pozisaun PR relativamente aprovasaun OJE 2018,” Nia argumenta.

Nune’e nia hanoin, kooperasaun bilaterál no multilateral ho instituisaun internasionál sira importante, maibé iha momentu ne’e seidauk oportunu, tanba  orsamentu viajen PR mós inklui iha OJE 2018.

Parte seluk Deputadu Joaquim dos Santos husi bankada Fretilín konsidera vizita PR hanesan vizita estadu, importante ba nasaun tanba ne’e nia husu labele impede PR atu ezerse ninia funsaun iha termu konstituisaun.

“Sei Parlamentu la-autoriza vizita ne’e, ita sei iha problema ho despeza ba viajen ne’e tanba  antes ne’e ita iha faktu ida ne’ebé la-autoriza PR halo vizita ba Portugal, ita lakon ona $100.000 resin. Agora daudauk PR iha ona planu ne’ebé programadu ona ba viajen ne’e, sei ita impede pakote vizita ne’e, ita sei lakon tan osan,” nia lamenta.

Nune’e nia husu lalika hanoin PR atu promulga ou lae OJE 2018, maibé impedimentu vizita estadu ne’e sei kria marjen atu lakon tan osan barak, tanba  servisu protokolár PR prepara ona servisu hirak ne’e.

Deputadu Adriano do Nascimento husi bankada PD hateten hare husi pozisaun bankada governu (CNRT, PLP, no KHUNTO), sira hakarak halo negosiasaun no sira hakarak hatene pozisaun PR konaba fó pose kandidatu membru governu no promulgasaun OJE 2018.

“Ita iha pozisaun la hanesan, entre bankada governu no opozisaun, ha’u la aseita deputadu sira halo presaun ba Prezidente Repúblika no hakarak hatene pozisaun konaba fó pose ba restu kandidatu governu no promulgasaun orsamentu”, katak.

Hatutan: “Ha’u hanoin ita aprova ona millaun $140, ha’u hanoin PR iha ona planu para orsamentu ne’e, ita labele kestiona konaba promulgasaun, iha osan ou la’e. Ha’u hanoin PR bele uza orsamentu ne’ebé promulga ona hodi halo viajen ba estranjeiru”.

Entretantu, pedidu PR ne’e mai pakote vizita estadu no trabalhu husi fulan Setembru to’o Dezembru, ne’ebé entre loron 7 to’o 10 Outubru.

Vizita hirak ne’e, PR halo tanba hetan konvite husi Governadór Jerál Komunidade Austrália, Peter Cosgrove atu hala’o vizita hodi hametin lasu amizade entre nasaun no povu Austrália no Timor-Leste.

Iha loron 11 to’o 14 Outubru hetan konvite husi PR Guinea Equatorial, hanesan vizita estadu ba nasaun irmaun no iha tempu hanesan partisipa selebrasaun tinan 50 proklamasaun independénsia nasaun ne’e.

Enkuantu iha  final fulan Outubru entre loron 28 to’o 1 Novembru, hetan konvite husi PR Indonézia, Jokowi, atu partisipa iha bali forum.

Nune’e mós iha 17 to’o 26 Novembru , via diplomátiku atu responde disponibilidade konvite santidade Papa Francisco, hodi agradese papél igreja katólika halo ba luta libertasaun povu Timor-Leste no ikus liu iha Dezembru, hetan konvite husi Sekretáriu Jerál ONU, António Guterres, atu partisipa iha enkontru altu nivel global compact ne’ebé sei realize iha Maroco iha loron 7 to’o 14 Dezembru.

Antes ne’e, iha loron 9 Jullu PN la aprova vizita PR ba Portugal hodi hametin lasu amizade entre nasaun Portugal no Timor-Leste, ho razaun Xefe Estadu tenke hare uluk situasaun rai laran.

Jornalista: Julia Chatarina | Editór: Manuel Pinto

Imajen: Prezidente Parlamentu Nasionál, Arão Noe, simu Prezidente Repúblika, Francisco Guterres Lú Olo, iha uma fukun hodi loke abertura kinta lejislatura. Imajen António Goncalves
PARTILHAR

Author: verified_user

Publicação luso-timorense sem fins lucrativos

0 comentários: