Seguransa Polisiál Seidauk Di’ak

DILI, (TATOLI) – Membru Komisaun B iha Parlamentu Nasionál ne’ebé trata asuntu seguransa no defeza, David Dias Ximenes, konsidera instituisaun Polisia Nasionál Timor-Leste seidauk iha tátika kolokasaun déspozitivu ba membru polisia atu fó seguransa di’ak ba sosiedade.

“Membru polisia sira nia atuasaun ba problema ruma iha Timor-Leste seidauk los tanba tátika kolokasaun dáspozitivu polisia sira mak seidauk los,” David Dias Ximenes levanta kestaun ne’e iha Parlamentu Nasionál, ohin.

Observasaun membru parlamentu nian durante ne’e hatudu katak kolokasaun despozitivu (kolokasaun-red) membru polisia sira atu fó seguransa ba sosiedade iha tempu kalan la iha, maibé loloos polisia sira tenke halo seguransa durante oras 24 nia laran ka polisia tenke la’o tun sa’e durante loron tomak atu fó seguransa ba povu.

Tanba ne’e, atu garante estabilidade ka evita problema, loron ho kalan polisia tenke iha li’ur nafatin, tuir motto instituisaun PNTL nian katak iha vizibilidade, envolvimentu no profisionalizmu.

“Ita observa loron kalan, liuliu kalan polisia la iha atu fó seguransa ba povu iha dalan. Ha’u la’ós kontra polisia maibé dehan de’it polisia atu susesu ka rezultadu di’ak kuandu nia halo operasaun preventiva,”  nia observa.

Maibé realidade hatudu katak kuandu ema baku malu ona iha fatin ruma foin bolu polisia to’o, pior liu sira (polisia) mai baku ema arbiru de’it, tanba sira la iha fatin hodi hatene loloos sé mak baku malu, hanesan kazu polisia baku membru RENETIL ida iha Delta Nova nian no seluk tan, liuliu kazu omisídiu ka alin feto ne’ebé ema soe iha Subaun.

“Ida ne’e mak sira ábitu baku ema, maibé loloos polisia sira la’ós atu baku ema, tanba polisia sira nia lei orgánika iha artigu 4 so sira bele uza forsa kuandu ema seluk halo rezisténsia hasoru sira nia servisu,” nia fó hanoin.

Entretantu, Parlamentu Nasionál sempre haree kondisaun vida polisia nian, maibé parte seguransa interna mós tenke servisu ho loloos, la’ós baku ema.

Jornalista: Zezito Silva | Editór: Manuel Pinto

Imajen: Deputadu bankada FRETILIN, David Dias Ximenes Mandati. Imajen António Goncalves