Eis Dep III Lej Laentrega Prado, PN Preve 1 Milaun Resin Sosa Kareta Ba Deputadu Foun

DILI - Relasiona ho Movimentu Estudante Universitariu Timor-Leste (MUTL) atu halo asaun demonstrasaun ba  V lejislatura atu sosa kareta foun, maibe tanba eis deputadu III lejislatura balu seidauk entrega Prado, tanba nee PN preve 1 millaun 700 resin sosa kareta 48 ba deputadu foun sira.

Informa Vice Bankada PLP Deputadu Francisco de Vasconcelos hatete, estudante sira dehan atu halo demo, maibe atu dehan katak problema laos kareta foun ho tuan, problema nee mak deputadu sira tenke iha fasilidade hodi halao servisu, liu-liu ba halo fiskalizasaun.

“Se kuandu kareta prado tuan nee iha kompletu hotu ita lapresiza hola kareta foun, maibe tanba prado neebe iha eis deputadu III lejislatura sira balu seidauk entrega, tanba mak atu kareta foun ba deit ba deputadu foun sira nee seidauk iha kareta. I atu sosa kareta ba deputadu foun sira nee hau mak proponente ba proposta hodi redus husi 65 ba 48,” katak Deputadu PLP nee ba STL Tersa (23/10/2018) iha PN.

Nia dehan, Agora dadaun kareta neebe eis deputadu III lejislatura sira uza nee barak mak seidauk lori fila mai, prosesu lao too ohin loron, maibe kareta nee seidauk mai. Maibe servisu deputadu sira ezije fasilidade, laos dehan sosa kareta tanba hakarak atu iha kareta foun, maibe tanba bazeia ba nesesidade.

Nunee mos Primeira Vice PN, Atual Prezidente PN interina Maria Angelina sarmento hatete, kona ba asuntu kareta prado desde III lejislatura mai too IV lejislatura seidauk iha solusaun. Maibe atu imforma ba publiku katak iha V lejislatura PPN tenta halo esforsu atu rezolve situasaun nee  hodi husu ba deputadu sira neebe foti ona kareta husi III lejislatura nian muda ona sapa matrikula ba privadu, atu hatama fali ba iha PN hodi fasilita deputadu foun seidauk iha kareta. 

Notisia kompletu lee iha jornal STL edisaun Kuarta (24/10/2018)

Guilhermina Franco | Suara Timor Lorosae