DILI, (TATOLI) – Porta-vóz
hosi juventude timoroan, José Ricardo husu ba Embaixada Portugal iha
Timor-Leste atu fó sai Narrativa, atu nune’e joven sira bele prosesa lais
dokumentu hodi ba Inglaterra atu buka moris.
“Dokumentu ne’ebé ami trata ne’e
durante tinan hitu nia laran, balun tinan neen, lima no to’o agora embaixada
lakohi fó sai rezultadu pozitivu, ami husu embaixada atu fó ami nia narrativa,”
José Ricardo ba jornalista sira hafoin halo aprosimasaun ba Parlamentu Nasionál,
ohin.
Juventude sira ne’e ohin la
konsege hasoru malu ho nia reprezentante iha uma fukun, tanba deputadu sira
“fadigadu” ho reuniaun komisaun parlamentár.
José Ricardo esplika tan, sira
ne’ebé trata dokumentu hirak ne’e kumpre hotu nia devér, maibé to’o agora
Embaixada Portugal seidauk fó joven sira nia direitu, ida ne’e tanba saida.
Tanba ne’e, timoroan ne’e husu
atu sira bele hetan apoiu hosi Parlamentu Nasionál nian liuhosi komisaun ne’ebé
trata asuntu Ministériu Negósiu Estranjeiru atu fasilita hodi Embaixada
Portugal bele atende lais dokumentu sira ne’ebé durante ne’e pendente.
“Dokumentu hirak ne’e ami trata
durante tinan barak ona maibé prosesu to’o iha ne’ebé ami la hetan informasaun
ruma hosi Embaixada Portugal. Ami husu nafatin, maibé sira la fó resposta di’ak
mai ami, entaun ami mai hasoru parlamentu atu fortifika ami hodi bele atende
dokumentu hirak ne’e bele iha solusaun lais,” nia esplika.
Entretantu to’o notísia ne’e tun
parte tatoli sei tenta halo konfirmasaun ba parte embaixada Portugés.
Jornalista: Zezito Silva | Editór:
Manuel Pinto
Imajen: Joven Timoroan iha
Embaixada Portugal nia oin hodi husu klarifikasaun hosi Embaixada kona-ba
dokumentu Narativa no Bilete Identidade ne'ebé tarde liu ona. Foto Zezito Silva
Sem comentários:
Enviar um comentário