Koronél Coliati Konsidera Kargu Xefe Estadu Maior Todan

DILI, (TATOLI) - Koronél Calistro dos Santos “Coliati” hateten maske orgullu maibé konsidera katak kargu Xefe Estadu Maior FALINTIL-Forsa Defeza Timor-Leste (F-FDTL) ne’ebé Estadu atribui ba nia todan.

“Sentimentu nu’udar sidadaun no nu’udar militár, sente haksolok (orgullu) espesiál liu-liu sentimentu ida ne’ebé todan katak hahú ohin iha momentu istóriku ida ne’ebé jerasaun tuan fó fiar ka tatoli hela instituisaun militár ida ne’e ba jerasaun foinsa’e,” Coliati ba jornalista sira liuhusi konferénsia ba imprensa iha Palásiu Prezidente Nicolau Lobato, Bairru Pité, segunda ne’e, hafoin simu pose hosi Prezidente Repúblika nu’udar Xefe Estadu Maior F-FDTL.

Nia informa, vizaun hanesan Xefe Estadu Maior, sei hala’o tuir planu Estratéjiku Militár 20-20 ne’ebé iha tiha ona.

“Ha’u nia papél ne’e atu kontinua de’it serbisu ne’ebé antigu Xefe Estadu Maior, Falur Rate Laek husik hela no sei buka kompleta karik seidauk kompletu, liu-liu sai nu’udar kolaboradór prinsipál ba Xefe Estadu Maior Jenerál iha área administrativa no lojístika,” Coliati esplika.

Entretantu, Prezidente Repúblika, Francisco Guterres Lú Olo, nu’udar Komandante Supremu Forsa Armada felisita no enkoraja Xefe Estadu Maior Coliati tanba hanesan kompatriota ida ne’e ne’ebé iha períodu susar teb-tebes luta libertasaun nasionál nian, nia (Coliati) fó-án tomak no hala’o kna’ar oi-oin, militár no klandestinu.

“Ha’u felisita Koronél Coliati tanba simu pose atu kaer kna’ar importante teb-tebes ida iha diresaun Estadu Maiór Koordenadór Konjuntu no hamutuk ho Vise Xefe Estadu-Maiór Jenerál Forsa Armada, sei fó akonsellamentu ba Xefe Estadu Maiór Jenerál Forsa Armada. Ha’u mós enkoraja Koronél Coliati atu kontribui ba ita-nia Forsa Armada atu dezenvolve no moderniza, nu’udar instituisaun ida ne’ebé tane aas nafatin espíritu, valór no determinasaun aswa’in FALINTIL sira-nian no atu la’o ba oin, ho laran-hakmatek no determinadu tuir intereses nasaun nian,” Lú Olo sublina.

Tuir nia katak Coliati hatudu kualidade pesoál, téknika no profisionál no mós virtude militár durante nia karreira tomak, hodi serbí Instituisaun Militár no Nasaun no kualidade sira ne’e hotu mak sai fatór determinante ba ninia nomeasaun, nu’udar Xefe Estadu-Maior.

“Ha’u hato’o ha’u-nia votu susesu ba misaun foun ida ne’e. Ita-Boot bele konta ho apoiu no solidariedade institusionál hosi ha’u, nu’udar Prezidente Repúblika no Komandante Supremu,” Xefe Estadu tenik.

Prezidente Repúblika nomea Coliati nu’udar Xefe Estadu-Maiór FALINTIL-Forsa Defeza Timor-Leste, liuhusi dekretu Prezidente Repúblika nú. 45/2018, loron 23 Outubru.

Koronél Coliati antes ne’e asumi kargu nu’udar Adidu Defeza Timor-Leste ba Australia, hahú husi Juñu 2014 to’o Jullu 2018. Nia moris iha 10 Agostu 1959, iha Suku Darulete, Postu Administrativu Liquiça.

Jornalista: Xisto Freitas | Editór: Manuel Pinto

Imajen: Koronél Calistro dos Santos “Coliati”