Iha
loron-tersa ne'e, membru sira hosi organizasaun oioin kritika ona vídeo ida
ne'ebé divulga hosi embaixada EUA iha Díli ne'ebé hatudu responsável edukativu
timoroan ida hatete katak labarik-feto sira hetan bandu hodi uza roupa balun
iha eskola sira hodi evita violénsia jéneru nian.
Vídeo,
ne'ebé publika iha pájina Embaixada nian iha Facebook, hamosu polémika maka'as
ho krítika sira hasoru nia konteúdu no tanba misaun diplomátiku asosia ba
pozisaun hosi responsável timoroan hodi divulga nia mensajen.
Halo
parte iha kampaña "16Days16Ways" - Halakon Violénsia Jéneru iha
Timor-Leste, vídeo hatudu deklarasaun hosi Duarte Bragança, diretor edukativu
munisipal iha Díli.
"Hodi
halakon violénsia jéneru iha eskola sira, bandu labarik-feto sira hodi sira
labele uza saia badak no roupa transparente, hanesan dalan hodi prevene abuzu
seksual", nia refere iha lian tétun, iha deklarasaun sira ho lejenda lian
inglés. "Ba mane, hodi evita violénsia hasoru labarik-feto sira, bandu uza
narkótiku sira, álkol ho tabaku iha eskola", nia hatutan.
Krítika
sira hasoru vídeo hato'o ona liuhosi karta aberta ida ne'ebé maka entrega ona
iha loron-tersa ne'e iha misaun diplomátiku no ne'ebé maka asina hosi sidadaun
timoroan oioin no mós sidadaun norte-amerikanu balun no asina mós hosi
responsável sira ka elementu sira hosi organizasaun sira hanesan Judicial
System Monitoring Programme (JSMP) ho The Asia Foundation Nabilan Program.
Karta
hatudu konsternasaun ho asaun ne'ebé sira bolu hanesan "vídeo
vergoñozu" ida ne'ebé maka divulga hosi embaixada iha semana liubá no husu
atu hasai lalais.
"Publikasaun
ne'e sei kontra kedas dékada barak serbisu nian, ho baze hosi estudu no
invetigasaun sira, hodi hakotu ho violénsia hasoru feto sira no labarik sira.
Tanba ne'e, ami husu atu hasai lalais no husu deskulpa ba feto sira no ba
labarik sira Timor-Leste nian", refere iha karta aberta ne'ebé maka Lusa
iha asesu.
"Bainhira
sujere atu labarik-feto sira tenki muda roupa ne'ebé sira uza hodi prevene
violénsia jéneru nian, interveniente iha vídeo hakarak duun vítima. Hanesan
grupu ne'ebé kompromete hodi promove igualdade jéneru nian no hakotu ho dalan
tomak diskriminasaun nian, ami la aseita mensajen públika sira ne'ebé duun
vítima sira tanba violénsia ne'ebé ema sira seluk halo hasoru nia", refere
mós hosi testu.
Testu
konsidera katak duun vítima sira "kontribui kedas ba kultura ida ne'ebé
violénsia hasoru feto sira no labarik-feto sira kontinua hetan
toleránsia".
"Ami
serbisu maka'as hela hodi harii kultura ida igualdade nian, respeitu ho
toleránsia zero hasoru violénsia tomak. Ami hein atu valor sira hosi Embaixada
EUA nian bele hanesan ho ami nian iha área ne'e", nia konsidera mós.
Testu
kestiona mós mensajen kona-ba ligasaun entre uzu álkol nian, droga sira no
tabaku nian, ne'ebé sira konsidera hanesan bosok, hosi solisita "prova
sira ne'ebé apoia deklarasaun sira ne'e", tanba laiha estudu sira kona-ba
kestaun ne'e iha Timor-Leste, ne'ebé iha nível aas sira hosi violénsia jéneru
nian.
Maski
opiniaun sira ne'ebé hatudu iha vídeo halo hosi elementu ida hosi Ministériu
Edukasaun no Kultura timoroan nian, divulga vídeo iha pájina embaixada nian
"implika katak Embaixada apoia opiniaun sira ne'ebé hato'o iha
vídeo", divulga vizaun sira no opiniaun sala sira ne'ebé aserta vítima
sira.
Bainhira
insisti hosi hato'o reasaun kona-ba polémika, embaixada haruka ona ba Lusa
deklarasaun ida liuhosi email hodi esplika katak plataforma hosi misaun
diplomátiku iha rede sosial sira refere katak opiniaun sira ne'ebé hatudu hosi
responsável sira ne'ebé la'ós ema norte-amerikanu "hanesan de'it ba
objetivu informativu sira no la reflete vizaun esensial ka iha apoiu hosi
Governu ka hosi Departamentu Estadu nian".
Iha
konkretu kona-ba violénsia jéneru nian, nota refere katak pozisaun Estadus
Unidus nian maka "promove igualdade jéneru nian no aumenta feto sira no
labarik-feto nia kbiit hanesan elementu sentral hosi nia polítika
externa".
Refere
katak Estadus Unidus "rekoñese katak violénsia jéneru halo susar maka'as
kapasidade hosi indivídiu sira, liuliu feto sira no labarik-feto sira, hodi
partisipa maka'as no kontribui iha nível ekonómiku, polítika ho sosial ba sira
nia família, komunidade sira ho sosiedade sira".
SAPO
TL ho Lusa
Sem comentários:
Enviar um comentário