MTKI Ho Parte Interesada Diskute SOP Ba Turizmu Kruzeiru Nian

DILI, (TATOLI) - Ministériu Turizmu, Komérsiu no Indústria (MTKI) halo diskusaun ho parte interesada (stakeholder) hotu sobre padraun ba prosedimentu operasionál (SOP, iha Inglés) turizmu kruzeiru nian.

Diretór Jerál Turizmu, José Filipe Dias Quintas, hatete SOP ne’e atu gia bainhira ró kruzeiru ne’e mai, ida-idak hatene nia knaar katak saida maka MTKI halo, setór privadu, instituisaun relevante sira seluk sei halo.

“Ne’e inisiativa husi Ministériu Turizmu, Komérsiu no Indústria tenta hela para serbisu hamutuk ho parseiru dezenvolvimentu liuliu Market Development Facility (MDF) ne’ebé hetan fundu husi Governu Austrália tanba to’o agora ita seidauk iha padraun ba prosedimentu operasionál nian, entaun ha Timór oportunidade di’ak ida para ita komesa hadi’a ita-nai sistema sira ne’e para ró kruzeiru mai ita bele atende sira ho di’ak”, Quintas afirma iha Sentru Konvensaun Dili, ohin.

Tanba bainhira SOP ne’e laiha maka lahatene ida-idak nia papél, entantu SOP ida ne’e sei iha faze diskusaun depois lori bá Konsellu Ministru.

Diretór Jerál ne’e dehan tanba Timor-Leste iha limitasaun ba fundu no rekursu umanu maka parseiru dezenvolvimentu sira ajuda iha SOP ne’e.

“Maibé obra iha dokumentu (SOP) ne’e Governu nian. Sira maka fó apoiu ba Governu para ita bele uza SOP ne’e atu halo jestaun di’ak ida ba Kruzeiru sira ne’ebé mai tanba to’o agora seidauk iha SOP klaru,  orsida mai dehan ne’e minstériu ida ne’e, ne’ebá nia serbisu, ita hanesan haksesuk malu kona-ba serbisu, entaun ho ida ne’e bele ajuda ita hatene didi’ak ita-nia knaar tanba bá ona iha Konsellu Ministru maka diskute orsida sé mak sei toma ona ba SOP ne’e”.

Quintas relata mós pontu balun ne’ebé sujere iha dokumentu ne’e katak poténsia portu ne’ebé maka Kruzeiru atu bá mak Jako. “Maibé Jako ne’e ita hatene katak área protejida nomós tama iha parke nasionál ne’ebé ita proteje didi’ak para asegura nia rekursu liuliu nia biodiversidade tanba ró kruzeiru ne’e mós perigozu kuandu ita lajere ho di’ak maka sei estraga ita-nia ahu-ruin sira ne’e”.

“Ne’ebé ró kruzeiru sira kuandu mai fó mós sujestaun hakarak vizita Jako, maibé Ministériu Turizmu dehan katak laiha, se hakarak vizita, imi vizita de’it Kom depois ho ró ki’ikoan sira bá, ró boot labele tama iha ne’ebá. Tanba ne’e maka ita presiza halo jestaun ba ida ne’e para asegura rekursu naturál sira, tanba ema mai ne’e atu haree ahu-ruin, ikan sira ne’e, se ita estraga maka sei lakon oportunidade no turista sira sei buka liu nasaun sira ne’ebé iha poténsia tasi kapa’as”.

Jornalista: Maria Auxiliadora | Editór: Manuel Pinto

Imajen: Governu no parte interesada diskute SOP turizmu kruzeiru nian. Foto/MTKI.