TL adere ba ASEAN, hein desizaun husi nasaun 10

Diretor ba Asuntu ASEAN (Association of South East Asia Nations) Ministériu Negósiu Estranjeiru no Kooperasaun (MNEK), Jorge Camões, hateten, kona-ba dezaun Timor-Leste nian ba ASEAN, hein desizaun husi nasaun 10 ne’ebé sai ona membru ASEAN.

Nasaun 10 ne’ebé sai ona membru ASEAN mak hanesan, Indonesia, Thailandia, Malaysia, Singapura, Filipina, Brunei Darussalam, Vietnam, Laos, Myanmar, no Kambodia.

“Prosesu ne’e la’os deit iha ita nia liman, prosesu ne’e iha mos membru ASEAN sira nia liman, entre sira tenke iha konsensu ida  hafoin ita bele sai membru ASEAN, sai membru ida dehan katak hein lai ou seida’uk iha buat ruma sira mos tuir ida ne’e”, hateten Jorge Camões ba JN-Diário, iha MNEK-Praia dos Coqueiros-Dili, Tersa (23/10/2018).

Diretor ba Asuntu ASEAN, Jorge Camões, hatutan katak, MNEK ho Asia Development Bank (ADB) prepapara ona Timor-Leste ba Asean Mobilization Plan (TILAM) ne’ebé sei hala’o enkontru ho liña ministeriais hotu hodi haree ba asuntu hotu-hotu.

“Ita kontinua prepara-an, ha’u hanoin Timor-Leste husi Ministériu Negósiu Estranjeiru hamutuk ho ADB prepara hela Timor-Leste Asean Mobilization Plan (TILAM), atu nune’e bele prepara-an iha area hotu-hotu ne’ebé presiza, bainhira ASEAN desidi TL adere ita preparadu, liga ba polítika seguransa ka polítika sosial ekonómiku, sosio kultural”,tenik Diretor ba Asuntu ASEAN ne’e.

Tanba ne’e, Diretor ba Assuntu ASEAN, Jorge Camões, aprofunda liu tan katak, Estadu Timor-Leste (TL), liu husi MNEK kontinua esforsu hodi TL bele sai membru ASEAN.

Jorge Camões dehan, durante partisipa iha enkontru ho ministru negósiu estranjeiruu ASEAN láiha país ida mak espresa sira nia preokupasaun ba Timor Leste atu tama ASEAN.

“Ha’u bele dehan klaramente enkontru lubuk ne’ebé ha’u partisipa ho ministru negósiu estranjeiru ASEAN hotu-hotu, laiha país ida mak espera sira nia preokupasaun iha pilar ne’ebé mak iha, polítika, seguransa, ka politik sosial ekonomia, sosio kultural”,nia haktuir.

Maibe, Jorge Camões, hateten Timor-Leste atu tama ASEAN ka la tama, presiza hadia rekursu umanu, ekonomia, infrestrutura no buat sira ne’e hotu hakarak ka lakohi hanesan país independenti ona haree ba do’ok no moris di’ak tenke hadia.

Tuir nia, Timor-Leste iha komitmentu ne’ebé kontinua husi Primeiru Governu to’o VIII Governu haree nafatin ba asuntu ne’e, no hadia aspeitu sira ne’e hadia uma laran, la’os tama de’it ba ASEAN bele mos sai membru sira seluk iha mundu ne’e. Eus  

GMN TV | Grupo Média Nacional