Governu timoroan sei selu restu divida ba operador boot nasaun nian iha tinan 2019

Governu timoroan sei selu iha tinan 2019 divida ne'ebé akumulada iha tinan barak nia laran ba Timor Telecom, operador boot nasaun nian, no prevé pagamentu ho valor dolares millaun 4,5 iha Orsamentu Jeral Estadu nian (OJE).

Pagamentu ho montante dolares millaun 4,5 ne'e, soma ho valor ne'ebé maka orsamenta hodi selu iha tinan ne'e, nune'e kompleta divida sira ne'e maka akumula iha tinan barak nian laran.

Dotasaun ne'e detallada iha proposta lei OJE ba tinan 2019 nian, no entrega iha loron-kinta ne'e hosi Governu ba Parlamentu Nasional hodi halo ninian prosesu formal, ne'ebé maka Lusa hetan asesu.

Iha final fulan Setembru, divida Estadu nia ba operadora ne'e hamutuk dolares millaun 9,3, tuir dadu sira ne'ebé maka Lusa hetan.

Valor divida nian, parte barak maka akumulada iha tinan barak, reprezenta 82,5% hosi total divida hosi kliente sira ba Timor Telecom (TT), ne'ebé maka seidau iha kalendáriu hodi regulariza, hatete fonte operadora nian ba Lusa.

Iha fulan tolu kotuk liubá, divida Estadu nian ba TT sa'e ba dolares rihun 653, tuir balansu informasaun finanseira operadora nian.

Iha total, TT simu hosi kliente sira, too final fulan Setembru ne'e dolares millaun 11,28.

Orsamentu Jeral Estadu nian ba tinan 2018, ne'ebé aprova iha final fulan kotuk ne'e, ho nasaun ne'ebé maka moris iha rejime duodesimu dezde fulan Janeiru, inklui mós dolares millaun 87 hodi selu divida no obrigasaun sira ne'ebé iha atrazu.

SAPO TL ho Lusa