DILI, (TATOLI) – Xefe Sentru
Saúde Komunitária Bekora (SSKB), postu administrativu Kristu Rei, Adelina
Pinto, hateten durante fulan ida nia-laran, ninia parte rejista pasiente ho
moras infesaun respiratória hamutuk 1066.
“Moras ne’ebé rejista afeta ba
ema ho idade hotu-hotu, maibé maioria ba labarik”, afirma nia ba Tatoli iha
Bekora, ohin.
Moras seluk mak diarreia 249,
pneumonia 15, dengue, tubercoluse no moras seluk tan hamutuk pasiente 1330.
Kauza klima iha tempu
udan maka afeta ba infesaun respitatória no diarreia aas, tanbe ne’e
klínika Bekora liuhosi programa Servisu Integradu Saúde Komunitária (SISKA),
klínika movel, saúde ba família lor-loron kontinua halo promosaun no edukasaun
saúde hodi halo prevensaun.
Nia esplika sintoma jerál hosi moras
infesaun respiratória mak inus metin (kustupadu), mear maran ne’ebé prodús hosi
pulmaun, kakorok moras, ulun moras, difísil atu dada iis.
Prevensaun importante ne’ebé kada
família no pasiente tenke halo bainhira moras ne’e akontese mak hemu bee barak,
konsume hahan ho nutrisaun hanesan ai-fuan no modo ne’ebé iha vitamina C,
deskansa sufisiente, prevene estress, halo ezersísiu regulár, fase liman ho
sabaun tuir nesesidade, prevene fuma no sigaru suar.
“Agora dadauk dengue iha, semana
kotuk deteta ona positivu ida iha ne’e, tanba kauza hosi udan monu rai, tanba
ne’e antes ne’e ami halo prevensaun hodi fahe aimoruk ba komunidade hodi tau
iha bee iha uma hun hodi hamate susuk nia oan, tenke hamos uma hun, bee
nalihun, bee iha baleta no lixu tau iha fatin”, akresenta.
Sintoma dengue mak temperatura
isin bele to’o 40 derajat celcius, ulun moras todan, sin mosu iha ain-tur, ruin
isin, laiha vontade han, sente laran sae no muta, no kafuak mean ne’ebé mosu
hafoin akontese isin manas durante loron rua to’o lima.
Denque hanesan moras daet ida
tanba kauza hosi susuk aedes aegypti ne’ebé moris iha ambiente ne’ebé la
seguru no moos.
Iha pasu lima importante ba
prevensaun mak família ida-idak tenke halo hanesan; hamos tanke bee
semana ida dala ida, tanba bee fatin ba susuk aedes aegypti atu moris
no aumenta barak.
Balde ense bee, vazu ai-funan, no
lata mamuk no sasan sira seluk ne’ebé bele hakiak susuk, tanba ne’e presiza
hamoos domingu ida dala rua. Rede ba kasa susuk ne’ebé bele uza hodi taka susuk
atu labele tama no sai uma laran liuhosi odomatan no janela.
Alende ne’e labele tara ropa foer
ho durasaun tempu naruk, tanba bele hakiak susuk. Bele uza kreme hodi
kose iha isin sira nakloke hanesan liman, ain bainhira viajen dook, no uza
muskateiru iha uma.
Tuir nia laiha problema kona-ba
falta aimoruk, tanba estok sufisiente, maibé dala ruma menus entaun kolabora ho
postu saúde haat ne’ebé estabelese hanesan Balibar, Darlau, Hera, Ailok hodi
foti aimoruk hosi ne’eba bainhira presiza.
Alende ne’e kontaktu saúde
munisipíu Dili no Servisu Autonomo Medikamentu no Ekipamentu Saúde (SAMES).
Aimoruk sira ne’ebé estok iha
maka oralit, antibiotika, amoxilin, paracetamol, uza ba isin manas. “Ami iha
aimoruk sufisiente atu halo atendementu ba pasiente sira”.
Klínika Bekora iha médiku jerál
20, médiku nehan ida, parteira 21, enfermeiru 20, enfermeiru nehan tolu,
enfermeira ba susuben inan rua, farmasia rua, laboratóriu lima, nutrisaun rua,
médiku record ida, tékniku nehan ida, saúde públika rua, seguransa
rua, motorista rua no servisu hamoos (cleaner) tolu.
Tuir estatistika, totál pasiente
ne’ebé halo tratamentu iha klínika durante 2018 hamutuk 23.266 ba moras hotu
hanesan ispa numeru aas, diaréa, dengue, tuberculose, partus, no nehan moras.
Jornalista: Agapito dos Santos ! Editora:
Rita Almeida
Imajen: Xefe Sentru Saúde
Komunitária Bekora (SSKB), postu administrativu Kristu Rei, Adelina Pinto.
Imajen António Goncalves
Sem comentários:
Enviar um comentário