Alfándega Investiga Hela Kazu Droga Ne’ebé Liu Hosi Fronteira

DILI, 31 maiu 2019 (TATOLI) - Autoridade Aduaneira (AA) ka Alfándega hahú horisehik halo ona investigasaun ba kazu droga ne’ebé liu hosi kontrolu Alfándega fronteira Mota-Ain Timor-Leste atubele hatene nia kauza loloos.

Diretór Jerál AA, José António Fátima Abílio, hateten, Alfándega agora halo hela investigasaun hodi haree tanba saida mak ida ne’e akontese.

“Falla ne’e iha saida, kuandu ami haree hotu depois mak ami hato’o relatóriu ba ami-nia superiór. En termu fasilidade embora mínimu, maibé ita tenta koloka ba iha ne’ebá, depois ita tenke haree mós hosi kapasidade instituisaun nian liuliu rekursu ida ne’ebé iha loron ida ne’ebá hala’o knaar, depois iha rezultadu investigasaun mak sei hatene loloos nia kauza ne’e saida,” informa  José António, ohin, iha edifísiu AA, área Palásiu Governu.

Nia afirma tan, investigasaun ne’ebé halo tenke kompriensivu sobre ai-moruk ne’e tama hosi ne’ebé, no nia sai ne’e, sei inklui iha parte análize. Bainhira droga ne’e tama no sai hosi Timor-Leste signifika nia tenke mai hosi fatin ruma, tanba ne’e hosi parte AA sei buka meiu hodi halo investigasaun to’o prosesu ai-moruk tama liuhosi meiu saida no hosi parte law enforcement sira mós iha knaar atu halo investigasaun.

Diretór Jerál ne’e dehan, kona-ba droga ne’e nia iha rede ida ne’ebé forte tebes no sira iha koñesimentu ida ne’ebé hakarak atu sees hosi kontrolu sira ne’ebé maka’as tebes.

“Ida ne’e mak ita hakarak buka tuir tanba ita mós lakohi para ita-nia nasaun ema dehan sai fali hanesan tránzitu ba droga ou merkadoria ba kontrabandu sira ne’e. Ita haree took lakuna iha ne’ebé? Será que ita-nia ekipamentu mak seidauk, ita-nia rekursu mak presiza hadi’a tantu nia koñesimentu tékniku, skill, buat sira ne’e hotu”.

Nia afirma katak,  Timor-Leste lakohi atu sai hanesan vítima ba prosesu tranzasaun ilegál sira ne’e. Nune’e, sei haree hosi parte AA no medida saida mak tenke hola atu hadi’a iha futuru.

Ho kestaun ne’e, Diretór Jerál husu ba sidadaun ein jerál tantu funsionáriu Alfándega tenke hatene tanba dala barak ema aproveita ekonomia país nian ne’ebé iha nune’e infiltra nia ema. Tanba ne’e presiza sensibiliza ba komunidade no pesoál Alfándega bainhira hala’o kontrolu ne’e serbisu ho responsabilidade, onestidade, integridade, para garante situasaun.

Alfándega Tenke Deskonfia Ema Lori Sasán Tama-Sai 

Diretór Jerál AA, José António Fátima Abílio, subliña Alfándega tenke deskonfia ema hotu ne’ebé lori sasán tama-sai bainhira serbisu iha fronteira atu proteje komunidade kona-ba importasaun merkadoria ilegál ka kontrabandu.

“Ita bele amigu, maun-alin, maibé bainhira ó liu fronteira tenke deskonfia”.

Liga ba kestaun kazál timoroan na’in-rua ne’ebé lori ai-moruk droga liuhusi fronteira ne’e no kaptura iha Alfándega Atambua nian, José António, dehan x-ray (mákina leno sasán) tantu Timor-Leste no Indonézia nian ne’ebé funsiona, sempre hatudu sinál.

“Filafali ba skill ema ne’ebé momentu tuur ne’ebá hodi haree ne’e, será que nia komprende ka lae, hatene ka lae buat sira ne’e hotu? Depois nia deskonfia iha dezeñu ne’ebá hanesan buat ruma mak deskonfia, nia tenke loke para haree. Orsida iha investigasaun maka ita haree nia prosesu ne’e oinsá?”.

Ho kazu ne’e AA dezde horisehik haruka ona ekipa bá fronteira hodi halo levantamentu, tracking fali iha sistema bainhira leno sasán ne’e no investiga husi ne’e tanba iha video vijilánsia (CCTV).

Sobre ekipamentu iha fronteira, Diretór Jerál ne’e dehan, sufisiente maski la sofistikadu liu hanesan nasaun sira seluk, maibé daudaun ne’e funsiona hela hanesan x-ray, no iha x-ray boot ne’e mak la funsiona.

Ho situasaun ne’e, AA sei intensifika sira-nia kontrolu no ekipa konjunta sei halo sira-nia kontrolu ne’ebé másimu, tenta halo ligasaun ho Alfándega rai seluk para bele partilla informasaun relasiona ho kestaun ne’e.

Aléinde ne’e tenta investe iha ekipamentu tanba x-rai sei monótona hela no buka ida dijitál para sasán tama ne’e bele haree husi leten, sorin foka hotu para bele deteta. Tanba ne’e, AA halo hela esforsu para iha orsamentu 2020 bele iha orsamentu rasik hodi bele antesipa ba ekipamentu ne’ebé presiza hodi fortifika kontrolu no antesipa orsamentu ba halo formasaun atubele responde ba sasán importasaun no esportasaun hodi halo análize, verifikasaun no halo kontrolu ne’ebé forte.

Tuir pájina Alfándega Timor-Leste nian ne’ebé TATOLI asesu, iha 29 maiu, kuaze tuku 12:57 pm oras Timór nian, sidadaun Timor-Leste na’in-rua (kazál) transporta droga ho tipu éktase bá Indonézia no hetan apreensaun (foti) hosi Alfándega Indonézia, iha Mota-Ain Batugadé, ho totál pílula (pil) 4874 subar iha mákina impresora tipu EPSON A4.

Kazál na’in-rua nee halo viajen baibain ho travel bá fronteira ho destinasaun bá Kupaun-Indonézia. Sira liu hosi kontrolu Alfándega Timor-Leste Mota-Ain ho scan maibé la deteta no ikus Alfándega Indonézia ka’er.

Hosi kazu ne’e AA tenta buka investigasaun no buka haree sé mak hola parte iha ne’e no hatene ona katak timoroan na’in-rua hola parte ona no husi investigasaun ne’e buka tuir no poténsia ai-moruk ne’e mai husi ne’ebé? Tanba ajénsia sira ne’ebé serbisu hamutuk ho Alfándega liuliu halo importasaun no esportasaun tenke iha sentidu nasionalizmu ida para bele proteje nasaun, labele haree de’it ba negósiu no meiu ne’ebé uza ne’e mós bele sai hanesan fasilita fali prosesu sira ne’e.

Sobre investigasaun ne’ebé halo ne’e sei lori tempu hodi konklui relatóriu tanba AA sei buka tuir dokumentasaun ne’ebé iha hodi analiza filafali no komunika ho nasaun sira ne’ebé nia liu mai Timor-Leste para haree.

Notísia relevante: /http://ww.tatoli.tl/2019/05/alfandega-atambua-kaptura-timoroan-fen-laen-lori-drog/

Jornalista: Maria Auxiliadora | Editór: Francisco Simões

Imajen: Diretór Jerál AA, José António Fátima Abílio. Imajen/Egas Cristovão.