domingo, 2 de junho de 2019

Planu Nasionál ba Dezenvolvimentu Kafé Ne’e Kompriensivu no Ambisiozu


DILI, 28 maiu 2019 (TATOLI) - Ministru Agrikultura no Peska, Joaquim José Gusmão dos Reis Martins, iha lansamentu ba Planu Nasionál ba  Dezenvolvimentu Setór Kafé (PNDSK) Timor-Leste 2019-2030, ohin, hatete, Governu deside ona hodi prepara planu ida ba setór Kafé, nune’e bele aselera modernizasaun ba setór ne’e. Planu ida ne’e kompriensivu, ambisiozu no iha vizaun ida ba longu prazu nian.

“Implementasaun planu ne’e sei la fasil, maibé planu ne’e fornese dalan ida ne’ebé klaru ba modernizasaun ba ita-nia setór Kafé no trajetu dobru produsaun iha 2030 no aumenta ba porsentu 270 husi reseita esportasaun Kafé,” Ministru Joaquim afirma iha ámbitu lansamentu ne’e iha Otél Timór.

 Ministru dehan, dalaruma fasil atu hakerek planu ida duké implementa. Planu ne’e kompriensivu tebes no tenke serteza katak ne’e sei implementa ho propriamente.

Atu halo ida ne’e, estabelese ona ekipa traballu espesiál ida ne’ebé sei halo soru-mutu pelumenus dala-ida iha fulan tolu nia laran hodi revee progresu ho nia implementasaun. Ekipa traballu ne’e sei prezide hosi Ministériu Agrikultura no Peska ho Asosiasaun Kafé Timor-Leste no loke mós ba parte interesada sira.

“Ita-nia planu foun sei bazeia ba ideia hosi Governu, setór privadu, NGO no parseiru dezenvolvimentu. Hotu-hotu servisu hamutuk hodi alkansa objetivu ida kompartilla. Planu ida ne’e iha divizaun detallada kona-ba atividade hotu no hatudu ajénsia sira hosi Governu relevante mak iha knaar hodi envolve iha planu ne’e”.

Governu sei fornese enkuadramentu polítika ida klaru no konsistente ba dezenvolvimentu setór Kafé. Planu ne’e marka faze dahuluk iha prosesu no inklui kompromisu atu melloria regulamentu no jestaun tomak iha setór Kafé. Governu mós sei fornese investimentu iha setór ne’e liuhusi orsamentu Estadu.

“Ita labele sertu kona-ba fundu saida mak disponivel iha futuru, maibé ita sei esforsu,” afirma Ministru Joaquim José Gusmão dos Reis Martins.

Hosi investimentu ne’e, tenik Joaquim José Gusmão dos Reis Martins, balun sei uza atu estabelese programa sira kona-ba peskiza dezenvolvimentu longu prazu hodi bele satisfás nesesidade iha setór Kafé.

“Ida ne’e krusiál tebes, maibé setór Kafé durante ne’e sei abandona hela”.

Aléinde ne’e, Governu sei investe hodi habarak treinamentu no apoia ba agrikultór Kafé no ida ne’e importante duni ba melloramentu produtividade no hasa’e to’os-na’in sira-nia rendimentu.

“Ita sei uza planu nasionál setór Kafé Timor-Leste atu hasai produtór Kafé sira husi ki’ak liuhusi dezenvolvimentu ita-nia setór Kafé hodi kria serbisu no hasa’e rendimentu husi família sira ne’ebé kuda Kafé”.

Planu foun ne’ebé deskreve nu’udar modelu kolaborativu ne’e prodús depoizde prosesu konsultivu ho instituisaun Governu, produtór Kafé, sentru prosesamentu no esportadór sira no mós Organizasaun Naun Governamentál sira ho parseiru dezenvolvimentu sira no liuliu Asosiasaun Kafé Timor-Leste.

Ekonomista Banku Dezenvolvimentu Aziátiku (ADB-siglaingles), David Freedman, hatete Planu Dezenvolvimentu Setór Kafé ne’e sei aselera modernizasaun setór Kafé ne’ebé presiza tebes iha Timor-Leste no koordenasaun metin ne’ebé sei asegura susesu husi implementasaun planu refere.

Planu ne’e iha meta ambisiozu atu halo dobru produsaun Kafé iha 2030 no aumenta rendimentu esportasaun to’o 270%. Planu ne’e sei finansia reabilitasaun plantasaun Kafé no treinamentu no dezenvolvimentu iha setór ne’e.

Lansamentu ba PNDSK ne’e hetan apoia inisiativa hosi ADB no Asosiasaun Kafé Timor-Leste. Planu ne’e ho espetativa atu hadi’a produtividade, kualidade no asesu produsaun Kafé iha Timor-Leste ba merkadu mundiál.


Jornalista: Maria Auxiliadora | Editór: Francisco Simões

Imajen: Ministru Agrikultura no Peska, Joaquim José Gusmão dos Reis Martins, ho Ekonomista Banku Dezenvolvimentu Aziátiku (ADB), David Freedman, bainhira jornalista sira entrevista iha lansamentu PNDSK. Imajen/Mídia MAP.

Sem comentários: