domingo, 2 de junho de 2019

Alfándega Atambua Kaptura Timoroan Fen-La’en Lori Droga


DILI, 30 maiu 2019 (TATOLI)—Servisu Alfándega Atambua, Timor Osidentál, Kuarta (29/5/2019), kaptura sidadaun timoroan na’in rua (2) fen-la’en ne’ebé lori droga hosi Timor-Leste atu ba fa’an iha Kupaun-Timor Osidentál.

Informasaun ne’ebé publika hosi Ajénsia Notisioza Indonézia, ANTARA haktuir, Servisu Alfándega Atambua, Distritu Belu, Provínsia Kupaun, Timor Osidentál, asegura fen-la’en ne’e tanba lori droga iha plástiku laran hosi Timor-Leste atu haku’ur liu ba Kupaun, Indonézia, liuhosi fronteira Mota Ain.

“Los duni, iha Kuarta horiseik, ami asegura (amankan) ema na’in rua, ne’ebé deskonfia hanesan fen-la’en lori droga hosi Timor-Leste atu ba fa’an iha territóriu Timor Osidentál (NTT-sigla Indonézia),” hateten Xefe Servisu Alfándega Atambua, Tribuna W, ohin, hodi responde ANTARA.

Hosi sorin seluk, fontes balun iha Fronteira Terrestre Mota Ain, informa ba Ajénsia TATOLI via telefone katak,   horiseik, Servisu Alfándega  Atambua nian kaer duni timoroan na’in rua tanba deskonfia lori droga no daudaun ne’e suspeitu na’in rua detein ona iha Polisia Atambua nian hodi submete ba investigasaun.

Suspeitu na’in timoroan rua ne’e, falun kabeer  ai-moruk ne’ebé deskunfia droga ne’e iha kafé rahun nia laran atu autoridade sira la bele deteta. Maibé, bainhira atu haku’ur liu ba fronteira Indonézia nian maka autoridade Alfándega  Indonézia nian deteta hetan no halo kapturasaun kedas hodi lori ba submete investigasaun iha Polisia Atambua.

Oras ne’e,  suspeitu nain rua fen-la’en ne’e detein héla iha sela Polisia Atambua, Provinsia Kupaun-Timor Osidentál (NTT).

EKIPA

Imajen: Evidensia droga ne'ebé Servisu Alfándega Atambua rekolla hosi suspeitu timoroan nain rua fen-la'en. Imajen/Espsiál Polisia Atambua

Sem comentários: