Governu sei halo pagamentu subsídiu ba reklamante sira iha fulan ne’e

DILI, 03 agostu 2020 (TATOLI) -- Governu liuhosi Ministériu Solidaridade Sosiál no Inkluzaun (MSSI) sei halo pagamentu ba subsídiu $200 ba reklamante sira iha fulan agostu ne’e bainhira prosesu avaliasaun ba dadus reklamasaun sira-ne’e ramata ona.

“Ha’u espera no tenta katak iha fulan agostu ne’e ita sei halo pagamentu ba ita-nia reklamante sira bainhira prosesu avaliasaun ba dadus reklamasaun sira ne’e ramata ona,” dehan Diretór Jerál Ministériu Solidaridade Sosiál no Inkluzaun, Rui Manuel Gago Exposto, ba Agência TATOLI iha nia knaar fatin MSSI, Caicoli, Dili, segunda ne’e.

Tanba, nia hateten, prosesu verifikasaun reklamsaun ba reklamante sira kuaze atu ramata ona no hein prosesu avaliasaun hosi Ministériu Administrasaun Estatál (MAE) no MSSI nian.

“Mekanizmu pagamentu subsídiu ne’e ita sei involve mós Ministériu Administrasaun Estatál (MAE) no MSSI, tanba bainhira ita halo prosesu avaliasaun ba reklamante sira mak foin deside katak hosi reklamante 14.175 ne’e, sé mak elizivél atu simu no sé mak la elizivél,” nia dehan.

Diretór Jerál MSSI ne’e hateten, to’o agora seidauk iha númeru hira mak elizivél atu simu no hira mak lae, tanba avaliasaun ida-ne’e sei hala’o bazeia ba dekretu lei númeru 15 tanba seidauk hatene ema hira loloos mak elizivél.

“Bainhira ita hatene ona katak hira mak elizivél entaun ita mós hatene ona osan hira mak sei selu ba reklamante sira. Tanba ne’e, ita sei hein bainhira ekipa avaliasaun halo avaliasaun ba reklamasaun ne’e ramata ona,” diretór MSSI ne’e hateten.

Nia dehan, ema ne’ebé mak elizivél atu simu pagamentu ne’e signifika xefe família hatama sira-nia dokumentu ba xefe suku no xefe aldeia iha loron 08 maiu 2020, entrega ba iha nasionál maka sei konsidera katak sei hetan sira-nia direitu.

“Ita atu dehan katak ema ne’ebé mak elizivél atu simu subsídiu $200 ne’e, hatama ona dokumentu ka fixa família ba iha nasionál hafoin xefe suku no xede aldeia halo verifikasaun ba iha loron 8 maiu 2020, ne’e ita konsidera sira-nia direitu ba pagamentu ne’e.

Maibé fixa família mak to’o iha 8 maiu latama iha nasionál, maka nia sei la hetan nia direitu,” nia hateten.

TATOLI | Jornalista: Osória Marques Editór: Cancio Ximenes | Imagem: António Gonçalves

Notísia Relevante: Horisehik, Ekipa Verifikasaun MSSI Hatama Ona Dadus ReklamasaunHamutuk 10.236